{"kind":"section","lang":"la","language":"Latin","title":"Iohannis 2.415-464","citation":"Corippus, Iohannis 2.415-464","ref":"2.415","level":null,"urn":null,"url":"https://interlinea.aeterna-institute.org/library/latin/corippus/iohannis/2.415","api":"https://interlinea.aeterna-institute.org/api/v1/library/latin/corippus/iohannis/2.415","markdown":"https://interlinea.aeterna-institute.org/library/latin/corippus/iohannis/2.415.md","author":{"name":"Corippus","url":"https://interlinea.aeterna-institute.org/library/latin/corippus"},"work":{"title":"Iohannis","url":"https://interlinea.aeterna-institute.org/library/latin/corippus/iohannis","urn":null},"verse":true,"words":311,"text":"Castra aduersa tenens media in tentoria transit\nIndubius sedemque feri petit inde tyranni.\nVmida nox caelo fulgentia sidera reddit\nPalantesque polo stellas. nam Cynthia cornu\nIam uacuo, obscurae nec praebens lumina terrae\nAequore mersa fuit: mensis tenuauerat ignes.\nSed non castra ducum noctis sensere tenebras:\nLumina densa focis per campos clara relucent,\nPerque altos montes splendet contermina tellus\nIgnibus et densae radiant in nubila siluae.\nQuis caelum a terris illa discernere posset\nNocte, ferens quae stella nitens, quae flamma fuisset?\nOmnia lumen erat. flammis hinc terra coruscat,\nInde polus stellis. quotiens scintilla cucurrit\nIgne uolans, sidus labens in nocte putatast.\nQuisquis ab aduersis uidit tentoria campis\nInscius, intremuit crescentia sidera credens\nInsolite esse polis. errauit nauita campis\nAequoreis nullisque modis cognoscere signa\nTunc ualuit cursusque reflexa puppe negauit.\nPeruigil insomnem miles Maurusque trahebat\nArmatus noctem. discurrens undique fossas\nCircuit, attonita sonitus explorat et aure\nCuncta cauens, ne quis fraudes temptaret in usu.\nNoctis et in dubiis inferret proelia castris.\nDiscurrunt uicibusque suis tentoria seruant\nEt uicibus placidum ferrati pectore somnum\nCarpunt inque sinus flectentes colla reponunt.\nHi clipeos, pharetras alii ceruicibus aptant\nSuppositas, hastasque tenent arcusque. sedentes\nEnsibus innixi uultus in pectore curuant.\nSomnus et auerso uix tangit lumina cornu\nEffugiens: iterumque caput iam iamque remittunt\nNec releuare ualent, oculos clauduntque mouentque,\nSollicitoque cadens quassatur pectore uertex.\nDum uigilant uariantque uices cursuque laborant,\nCetera iam somnos castris secura iuuentus\nPectore carpebat placido. tantum improba Martis\nFacta urgent mentes: animos insomnia turbant\nSollicitos uariasque ostendunt nocte figuras.\nMiles ut in tenero laxauit membra sopore,\nRore nouo primus madidis mox irruit alis\nSomnus et effuso flauerunt pectora cornu,\nCastra aliena rapit celsis de montibus absens.\nCorpore dormit iners, animo tamen ille laborat\nBella gerens, uincitque trahens aut uulnerat hostem,\nAut uitat clipeo uenientia uulnera cautus\nOpposito. nunc diuiditur sensuque manuque,\nNunc utrumque mouet. siluis bellare uidetur\nIpse sibi, nam membra uacant languentia somno.","prev":{"citation":"Iohannis 2.369-414","label":"Book 2, lines 2.369-2.414","url":"https://interlinea.aeterna-institute.org/library/latin/corippus/iohannis/2.369","api":"https://interlinea.aeterna-institute.org/api/v1/library/latin/corippus/iohannis/2.369"},"next":{"citation":"Iohannis 2.465-488","label":"Book 2, lines 2.465-2.488","url":"https://interlinea.aeterna-institute.org/library/latin/corippus/iohannis/2.465","api":"https://interlinea.aeterna-institute.org/api/v1/library/latin/corippus/iohannis/2.465"},"credit":{"text":"Corippus, Iohannis. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/CORIPP%7Cioha%7C000","quality":"proofread"}}