{"kind":"section","lang":"la","language":"Latin","title":"Iohannis 3.1-46","citation":"Corippus, Iohannis 3.1-46","ref":"3.1","level":null,"urn":null,"url":"https://interlinea.aeterna-institute.org/library/latin/corippus/iohannis/3.1","api":"https://interlinea.aeterna-institute.org/api/v1/library/latin/corippus/iohannis/3.1","markdown":"https://interlinea.aeterna-institute.org/library/latin/corippus/iohannis/3.1.md","author":{"name":"Corippus","url":"https://interlinea.aeterna-institute.org/library/latin/corippus"},"work":{"title":"Iohannis","url":"https://interlinea.aeterna-institute.org/library/latin/corippus/iohannis","urn":null},"verse":true,"words":285,"text":"At ducis inuicti iactabant pectora curae,\nSollicitusque suis nullum per membra soporem\nAccipit, et dulci non claudens lumina somno\nPeruigil in mediis disponit munia castris.\nCircumquaque duces uallantes agmine denso\nConsilium pariter summis de rebus habebant,\nTractatu uario noctem sermone trahentes.\nGaudia militiae referunt tristesque labores\nQuaeque Latinus agit uincens exercitus orbem,\nNunc bene commissas referentes ordine pugnas,\nNunc male gesta nouo memorantes bella dolore.\nDum diuersa canunt ductor sic forte locutus:\n\"Qualis in aduentu fuerat tunc Africa nostro,\nO socii, saeuis esset dum maxima regnis\nVltio missa dei, tristem quae rite tyrannum\nVandalicumque genus centeno perderet anno!\nGeilamir infandus qua ui uexauerat Afros\nPerdideratque nocens, magnus quo tempore ductor\nSub iuga Sidonias misit Belisarius arces,\nPrincipibus captum praesentans urbe tyrannum!\nQuam celeri cursu summis tot bella peracta\nViribus, aut quae digna uirum fortuna secuta est!\nIbat in adductas densis exercitus umbras\nArboribus, rapidi nec solis torridus ardor\nMilitiae nocuit, feruens aestate perusta,\nQuamquam autumnus erat, Phoebi candentis et axe\nTristia bella magis calida inferrentur harena.\nNec minus et capto, facta iam pace, tyranno\nLaeta fuit. plenam Libyam cultamque reliqui,\nInque statu proprio me discedente remansit\nEt melior (sum namque memor): fecunda, redundans\nFrugibus et fructus lumen fundentis oliuae\nEt latices laeti turgens referebat Iacchi.\nPax erat alta locis. quae tanta insania belli?\nQuis furor exarsit miseris insanus in aruis?\nQuae mouet immerito quatiens Bellona flagello\nInnumeras gentes? uel quae succedit Erinys\nEt Phaethonteos commiscens gentibus ignes\nOmnia sic mergit, ualida labente ruina?\nDic age, quisquis ades quaesiti temporis index.\"\nGentius egregius respondens uoce magistro,\nIpse magister, ait: \"digno uenerande fauore,\nRector summe ducum, nutantis destina terrae,\nSpes Libyae nostrique fauor uirtusque triumphi,\nImpia quae fuerit belli nascentis origo\nNos latet, abstrusis penitus contecta latebris.","prev":{"citation":"Iohannis 2.465-488","label":"Book 2, lines 2.465-2.488","url":"https://interlinea.aeterna-institute.org/library/latin/corippus/iohannis/2.465","api":"https://interlinea.aeterna-institute.org/api/v1/library/latin/corippus/iohannis/2.465"},"next":{"citation":"Iohannis 3.47-90","label":"Book 3, lines 3.47-3.90","url":"https://interlinea.aeterna-institute.org/library/latin/corippus/iohannis/3.47","api":"https://interlinea.aeterna-institute.org/api/v1/library/latin/corippus/iohannis/3.47"},"credit":{"text":"Corippus, Iohannis. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/CORIPP%7Cioha%7C000","quality":"proofread"}}