{"kind":"section","lang":"la","language":"Latin","title":"Iohannis 3.136-183","citation":"Corippus, Iohannis 3.136-183","ref":"3.136","level":null,"urn":null,"url":"https://interlinea.aeterna-institute.org/library/latin/corippus/iohannis/3.136","api":"https://interlinea.aeterna-institute.org/api/v1/library/latin/corippus/iohannis/3.136","markdown":"https://interlinea.aeterna-institute.org/library/latin/corippus/iohannis/3.136.md","author":{"name":"Corippus","url":"https://interlinea.aeterna-institute.org/library/latin/corippus"},"work":{"title":"Iohannis","url":"https://interlinea.aeterna-institute.org/library/latin/corippus/iohannis","urn":null},"verse":true,"words":296,"text":"Quid iuuat hic nimium perituras surgere gentes\nOrbis ab occasu? quid tantum surgit in altum\nVnde cadat rursus? nostris praesumptus ab aruis\nEn spoliis oneratus abit, tandemque reuersus\nProluit, heu, nostro concretos sanguine campos!\"\nTalia dicentis uultus in terga retorsit\nConcussa ceruice furor: subitoque tremescens\nConticuit uastoque ad terram pondere fluxit,\nEt dubium murmur defessa per ora cucurrit.\nSic, ubi lymphigeros deducit fistula tractus\nAere cauo, liquidus dum currens funditur amnis\nRauca sonans: placitum si fluxos sistere ductus,\nObice contorto patulum celer arte magister\nObstruit amnis iter, uertex truncatur aquarum\nObicibus clausis, ad fontem refluit(==REFLU-IT) amnis,\nEt reliquus fessa transcurrit riuulus unda.\nResponsis sublata nouis gaudetque siletque:\nNamque humilis gens illa fuit. tamen omnis in illum\nSpesque metusque coit: sacrum seruantque fouentque,\nPromissoque sibi fatorum munere gaudent.\nSeptimus et decimus nascentem sumpserat annus,\nCum puer infaustis admouit bracchia furtis.\nCacus ut Herculeis cariturus luce lacertis\nNoctis iter metuendus init, raptumque retraxit\nDuctorem patremque gregis colloque leuauit\nObnixus portatque furens et pergit in antrum.\nStrangulat inde premens constricto gutture pugno.\nCorruit ante pedes aries prostratus anheli,\nLaniferi spes una gregis. tunc ense reclauso\nDeripit astrictam magno cum pondere pellem.\nViscera nuda patent. frustis conciditur + altis\nOmne pecus, uerubusque trementes conserit artus.\nVritur horrendum flamma torrente cadauer.\nIgnibus in mediis semiustum sorbet anhelans\nIntrepidus totumque fero consumpsit hiatu.\nTempore iam ex illo saeuis adulescere furtis\nIncipit obscurisque fauentes pascere praedis.\nContrahit inde uiros secumque ad furta nefandus\nIn mediis tacitos exhortans ire tenebris\nArte docet, totumque trahit iam raptor ouile\nIamque armenta boum. celsisque abscondere praedam\nMontibus abstrusisque latebras quaerere saxis\nEt loca tuta parat. capta subsidere ualle\nVandalicasque latens audet temptare phalangas.\nQuantos ille duces, quantos truncauerat hostes\nObsidione premens mediis in faucibus ense,\nBarbaricasque trahens peruerso numine turmas\nImpius in latis prostrauit cuspide campis!","prev":{"citation":"Iohannis 3.91-135","label":"Book 3, lines 3.91-3.135","url":"https://interlinea.aeterna-institute.org/library/latin/corippus/iohannis/3.91","api":"https://interlinea.aeterna-institute.org/api/v1/library/latin/corippus/iohannis/3.91"},"next":{"citation":"Iohannis 3.184-227","label":"Book 3, lines 3.184-3.227","url":"https://interlinea.aeterna-institute.org/library/latin/corippus/iohannis/3.184","api":"https://interlinea.aeterna-institute.org/api/v1/library/latin/corippus/iohannis/3.184"},"credit":{"text":"Corippus, Iohannis. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/CORIPP%7Cioha%7C000","quality":"proofread"}}