{"kind":"section","lang":"la","language":"Latin","title":"Iohannis 3.271-317","citation":"Corippus, Iohannis 3.271-317","ref":"3.271","level":null,"urn":null,"url":"https://interlinea.aeterna-institute.org/library/latin/corippus/iohannis/3.271","api":"https://interlinea.aeterna-institute.org/api/v1/library/latin/corippus/iohannis/3.271","markdown":"https://interlinea.aeterna-institute.org/library/latin/corippus/iohannis/3.271.md","author":{"name":"Corippus","url":"https://interlinea.aeterna-institute.org/library/latin/corippus"},"work":{"title":"Iohannis","url":"https://interlinea.aeterna-institute.org/library/latin/corippus/iohannis","urn":null},"verse":true,"words":297,"text":"Subtrahit a miseris almae Fortuna salutis\nPraesidium mortemque alterno Marte minatur.\nQuem fugiant? qua parte cadant? praedantur ubique,\nTerror ubique uiris. saeuas sic tota per illas\nMaxima terrarum est Libye nudata rapinas,\nVt perit in dubiis puppis, heu, naufraga uentis.\nPoenorum has pestes solito miseratus ademit\nMore pius princeps, Afris solacia fessis\nSumma ferens, uictorque malum deiecit utrumque,\nSidonios patres titulis melioribus augens.\nVestra manus miseros mortis de faucibus Afros\nEripuit fessisque iugum crudele retraxit.\nAfrica surrexit uestris erecta triumphis:\nGaudia post luctus terrae donastis amicae,\nDum premitis gentes, totum dum uincitis orbem.\nIntremuere feri uestra uirtute subacti\nMaurorum tunc bella duces, tunc proelia quisque\nVestra pauens alacer frenos et iura cucurrit\nPrincipis ultro pati. florens haec gaudia sensit\nNostra decem tellus plenos laxata per annos,\nEt, quamuis fuerint fato pellente rebelles,\nAnte magis cecidit quam praedam tolleret hostis.\nNon + mentis consensit + tunc Africa bellum\nTe uigilante, pater. spectauit Leucada pugnas\nVirtutemque tuam. pinguescunt sanguine campi,\nOssibus albescunt, feriuntur uomere rapta\nEx umeris capita et sparsi per gramina trunci\nEnse tuo. cunctis notum est quid gesseris illo\nMarte, fauente deo. tantis signare tropaeis\nQuis potuit campos? ornasti, magne, decorans\nEt Solomoniacos auxisti saepe triumphos.\n+ aspice ille semul bellum temptauit Iaudas\nEt tulit: ante tamen campos quam uidit apertos\nEt mediis tremuit Romanos currere siluis. +\nAt Stutias orsus nostra de parte duellum.\nHaec rabies, haec ira fuit, haec addita rebus\nCura nefanda piis: bellum ciuile reuixit.\nTunc Carthago feras dirupto foedere praedas\nSensit et infandum non aequo Marte periclum.\nSed tamen hic celeri deuictus tempore cessit:\nHunc Membressa suis uidit concurrere campis,\nHunc eadem petiisse fugam, cum maximus hostes\nFudisset modicis uictor Belisarius armis.\nTe quoque per medias uidit Victoria pugnas,\nFortis et irruptis truncabas agmina castris\nEnse graui, similique uiros uirtute necabas\nGermano spargente ferum uictumque tyrannum.","prev":{"citation":"Iohannis 3.228-270","label":"Book 3, lines 3.228-3.270","url":"https://interlinea.aeterna-institute.org/library/latin/corippus/iohannis/3.228","api":"https://interlinea.aeterna-institute.org/api/v1/library/latin/corippus/iohannis/3.228"},"next":{"citation":"Iohannis 3.318-359","label":"Book 3, lines 3.318-3.359","url":"https://interlinea.aeterna-institute.org/library/latin/corippus/iohannis/3.318","api":"https://interlinea.aeterna-institute.org/api/v1/library/latin/corippus/iohannis/3.318"},"credit":{"text":"Corippus, Iohannis. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/CORIPP%7Cioha%7C000","quality":"proofread"}}