{"kind":"section","lang":"la","language":"Latin","title":"Iohannis 3.360-408","citation":"Corippus, Iohannis 3.360-408","ref":"3.360","level":null,"urn":null,"url":"https://interlinea.aeterna-institute.org/library/latin/corippus/iohannis/3.360","api":"https://interlinea.aeterna-institute.org/api/v1/library/latin/corippus/iohannis/3.360","markdown":"https://interlinea.aeterna-institute.org/library/latin/corippus/iohannis/3.360.md","author":{"name":"Corippus","url":"https://interlinea.aeterna-institute.org/library/latin/corippus"},"work":{"title":"Iohannis","url":"https://interlinea.aeterna-institute.org/library/latin/corippus/iohannis","urn":null},"verse":true,"words":296,"text":"Iustitium meruit, sed nullis lumina tectis\nEffundunt lacrimas: uilis mors omnibus illa.\nIam Libycis uacuae cessabant ciuibus urbes;\nRarus et in multis domibus uix unus oberrans\nDiuitias longa quaerebat lite parentis.\nImmeritus iam plenus opum, qui mille parentum\nHeres erat. non notus auis patrimonia, fructus,\nArgentum uestesque simul flauumque metallum\nAbstulit, et tantis impleuit praedia rebus\nInsaturus. magnis cumulata est arca sacellis,\nEt tamen ardor inops numquam satiatur auaris.\nConiugiis caluere nouis, uiduasque potentes\nAccipiunt; nullis uirgo quaesita maritis:\nConiugis ob nummos defuncti quaeritur uxor,\nVirginibus dos parua datur; sic tempore diro\nNulla maritales curauit reddere luctus.\nHinc fora cuncta patent, et tristes surgere lites\nIncipiunt. saeuit toto discordia mundo\nIurgia saeua mouens. pietas omnino recessit.\nIustitiam nullus compuncta mente secutus.\nInde est quod miseris ira dictante flagella\nOmnipotens genitor, dilato tempore nullo,\nAddidit et lites cunctis iratus ademit.\nErigit a nostris nascentem finibus hostem.\nHic fratris mortem concussa mente dolebat,\nSed uirtus non ulla fuit qua surgere posset.\nDum tamen occultum conseruat pectore bellum,\nMilitis innumeras fatum miserabile sensit\nDiminuisse manus. gentes non laesit amaras\nMartis amica lues: metuens tamen ille cauebat\nNe mala praedatae caperet contagia terrae.\nAst ubi pulsa lues, Martis succedere feruor\nCoepit et infandas acies ad bella coegit.\nMisit ad extremas Libyae sitientis harenas,\nSole ubi tellurem nimio siccauerat olim\nFulmine deiectus Phaethon, populosque malignos\nEdocuit nostrisque impleuit cladibus aures.\nIamque ferae gentes Libycum funduntur in axem.\nRaptor ubique furens per nostras currere terras\nEt uastare casas ignemque immittere tectis\nIncipit et flammis succendere feruidus urbes.\nVt Solomon uidit tantum consurgere bellum,\nRomanas acies cunctis de partibus actas\nContrahit, aduersis properans concurrere fatis.\nIlicet infausto mandatur pagina cursu,\nEt ruit ecce uolans, aequo non Marte coactus,\nMaurorum ductor, miseri Solomonis amicus,\nRomanis rebus nimium semperque fidelis\nCusina + Mastracianos secum + uiribus ingens.","prev":{"citation":"Iohannis 3.318-359","label":"Book 3, lines 3.318-3.359","url":"https://interlinea.aeterna-institute.org/library/latin/corippus/iohannis/3.318","api":"https://interlinea.aeterna-institute.org/api/v1/library/latin/corippus/iohannis/3.318"},"next":{"citation":"Iohannis 3.409-451","label":"Book 3, lines 3.409-3.451","url":"https://interlinea.aeterna-institute.org/library/latin/corippus/iohannis/3.409","api":"https://interlinea.aeterna-institute.org/api/v1/library/latin/corippus/iohannis/3.409"},"credit":{"text":"Corippus, Iohannis. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/CORIPP%7Cioha%7C000","quality":"proofread"}}