{"kind":"section","lang":"la","language":"Latin","title":"Iohannis 3.47-90","citation":"Corippus, Iohannis 3.47-90","ref":"3.47","level":null,"urn":null,"url":"https://interlinea.aeterna-institute.org/library/latin/corippus/iohannis/3.47","api":"https://interlinea.aeterna-institute.org/api/v1/library/latin/corippus/iohannis/3.47","markdown":"https://interlinea.aeterna-institute.org/library/latin/corippus/iohannis/3.47.md","author":{"name":"Corippus","url":"https://interlinea.aeterna-institute.org/library/latin/corippus"},"work":{"title":"Iohannis","url":"https://interlinea.aeterna-institute.org/library/latin/corippus/iohannis","urn":null},"verse":true,"words":279,"text":"Vester Caecilides illa de parte tribunus,\nSi iussus coepti referat discrimina belli,\nCuncta docere potest: ciuis quippe omnia nouit\nIn patria commissa sua, gentesque locosque\nAuctoremque mali prisci seu temporis iram.\"\nPraecipitur placidis Liberatus dicere uerbis.\nParuit ille celer, plana sic uoce locutus:\n\"Nitor, summe ducum, causas narrare malorum\nEt iussis parere tuis. dum dicere tempto,\nFlamma nocens surgit, gelidus praecordia sanguis\nTurbat et attentae uix prodit fabula linguae.\nPraecipis ipse meos iterum me ferre labores,\nDum refero saeuum quod pertulit Africa bellum.\nSed quia celsa premunt dominantis iussa magistri,\nHinc procul esto, dolor: magno iam uinceris ausu.\nParendum est iussis humilique pauore sequendum.\nPrincipio geminas iam senserat Africa pestes:\nNunc iterum geminas sentit miseranda ruinas.\nFinibus in nostris orta est, quae creuit in orbe,\nImpietas. Guenfan miseris est tristis origo\nAntala nascente fero. nam tempore prisco\nPax erat in cunctis Libyae tutissima terris.\nGaudebat miseranda nouis ornata coronis\nAfrica. nectebant flauis gestamen aristis\nAgricolae, solitoque rubens in palmite Bacchus\nPaxque sua laetam fulgens ornabat oliua.\nVsque ad ter denos Antalae floruit annos\nNascentis, nostrique potens pars maxima mundi\nClaruit, ut toto praefulgens Lucifer axe\nStellarum flammas flamma meliore reuincit.\nQuae dedit in nostris proles Guenfeia terris,\nSumme pater, capiti ipsorum generique reserua.\nParuulus ille feris mox contigit ubera labris,\nTerribili monitu iam iam flammante Megaera\nFama uolat metuenda canens. namque Ammonis(==AMMO-NIS) ipse\nTempla petit simulata pater. tunc prolis iniquae\nFata tremenda rogans mactat de more profano\nHorrida sacra Ioui, tristes et Apollinis aras\nInde petens Phoebi tripodas laurusque requirit.\nFunditur horrendis sanguis maestissimus aris,\nOmnigenumque pecus mactat uittata sacerdos,\nFata mouens: raptis primum quaesiuit in extis\nInspiciens (series patuit longissima) fibras,\nDiraque perpetuis imponit uiscera flammis.","prev":{"citation":"Iohannis 3.1-46","label":"Book 3, lines 3.1-3.46","url":"https://interlinea.aeterna-institute.org/library/latin/corippus/iohannis/3.1","api":"https://interlinea.aeterna-institute.org/api/v1/library/latin/corippus/iohannis/3.1"},"next":{"citation":"Iohannis 3.91-135","label":"Book 3, lines 3.91-3.135","url":"https://interlinea.aeterna-institute.org/library/latin/corippus/iohannis/3.91","api":"https://interlinea.aeterna-institute.org/api/v1/library/latin/corippus/iohannis/3.91"},"credit":{"text":"Corippus, Iohannis. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/CORIPP%7Cioha%7C000","quality":"proofread"}}