{"kind":"section","lang":"la","language":"Latin","title":"Iohannis 3.91-135","citation":"Corippus, Iohannis 3.91-135","ref":"3.91","level":null,"urn":null,"url":"https://interlinea.aeterna-institute.org/library/latin/corippus/iohannis/3.91","api":"https://interlinea.aeterna-institute.org/api/v1/library/latin/corippus/iohannis/3.91","markdown":"https://interlinea.aeterna-institute.org/library/latin/corippus/iohannis/3.91.md","author":{"name":"Corippus","url":"https://interlinea.aeterna-institute.org/library/latin/corippus"},"work":{"title":"Iohannis","url":"https://interlinea.aeterna-institute.org/library/latin/corippus/iohannis","urn":null},"verse":true,"words":277,"text":"Inde ferox rapitur, subito correpta furore\nTerribilis, mersosque simul per uiscera cultros\nImprimit ipsa sibi. multus de corpore sanguis\nInfluit, et crebro geminat cum uulnere ferrum.\nErigit alta comas, tunc flammea lumina torquet\nSubsiliens, saltusque rotat flexusque malignos\nCorporis acta sui. rubor igneus inficit ora\nNuminis icta nota; ludunt ceruixque comaeque\nInque umeros utrosque cadunt. praecordia raucis\nFlatibus alta sonant; miscentur murmura, uoces\nTunc dubiae, plenumque agitant suspiria pectus.\nNon aliter primos surgens Vulcanus ad ignes\nFollibus obductis tumidos concurrere uentos\nArte mouet, flammasque ciens Eurosque sonantes\nAsperat, exhaustas renouans fornace procellas.\nTunc mala fata canens dictis respondet iniquis:\n\"Vandalicas, Guenfan, pariter Libycasque ruinas\nFata trahunt, Maurisque iugum frenosque resoluunt.\nAntala crescente tuo furor omnis et ira\nHorribili miserum turbabunt lampade mundum.\nFlammea Tisiphone tortis saeuire chelydris\nIncipit, erexitque rigentes uertice crines\nAera per uacuum. nigris infusa uenenis\nOra madent, foedant oculis linguisque trisulcis\nTemperiem, diroque horrescunt tempora tabo.\nSanguine Vandalico uideo decurrere riuos\nMontibus. en Libycas exurunt ignibus urbes!\nEn praedam exhaustis rapiunt <raptam>que reclaudunt!\nCur tamen, o superi, tantum turbare paratis?\nOmnia mixta simul. quid + multim + crescere Mauris?\nEn iterum pereunt. quid iuuit tempore paruo\nVirtute indomita partam meruisse ruinam?\nHic leuat, hic perdet multas cum nomine gentes\nInfans, et uario rapiuntur tempora fato.\nAfrica namque suum factorem fessa rogabit,\nQuem colit ipsa deum, quem fas cognoscere dignos.\nTunc Orientis opes Romani maximus auctor\nNominis, heu, nostros mandat praesumptus in axes.\nClassibus ecce suis totum conterritat orbem.\nIam puer indomitus subito pallore tremescit\nClassis in aduentu: iuga iam supportat anhelus:\nPondera magna domant: ardet dirumpere uincla\nIndigna ceruice ferens, ruptisque catenis\nEn iterum bellare parat. concursus ad illum\nEcce uenit, mundumque puer subuertere currit.","prev":{"citation":"Iohannis 3.47-90","label":"Book 3, lines 3.47-3.90","url":"https://interlinea.aeterna-institute.org/library/latin/corippus/iohannis/3.47","api":"https://interlinea.aeterna-institute.org/api/v1/library/latin/corippus/iohannis/3.47"},"next":{"citation":"Iohannis 3.136-183","label":"Book 3, lines 3.136-3.183","url":"https://interlinea.aeterna-institute.org/library/latin/corippus/iohannis/3.136","api":"https://interlinea.aeterna-institute.org/api/v1/library/latin/corippus/iohannis/3.136"},"credit":{"text":"Corippus, Iohannis. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/CORIPP%7Cioha%7C000","quality":"proofread"}}