{"kind":"section","lang":"la","language":"Latin","title":"Iohannis 4.232-279","citation":"Corippus, Iohannis 4.232-279","ref":"4.232","level":null,"urn":null,"url":"https://interlinea.aeterna-institute.org/library/latin/corippus/iohannis/4.232","api":"https://interlinea.aeterna-institute.org/api/v1/library/latin/corippus/iohannis/4.232","markdown":"https://interlinea.aeterna-institute.org/library/latin/corippus/iohannis/4.232.md","author":{"name":"Corippus","url":"https://interlinea.aeterna-institute.org/library/latin/corippus"},"work":{"title":"Iohannis","url":"https://interlinea.aeterna-institute.org/library/latin/corippus/iohannis","urn":null},"verse":true,"words":302,"text":"Nam pater ille bonus summis Athanasius Afros\nConsiliis media rapuit de caede maligni.\nHic potuit Libyam Romanis reddere fastis\nSolus et infestum leto damnare tyrannum.\nArmenius tanti fuerat tunc ille minister\nConsilii. hunc placidus cana grauitate coegit\nImmitem mactare uirum. temptare periclum\nNon timuit genitor pro libertate senilis.\nGuntarith infelix, cupiens fera regna tenere,\nArmenios enses saeua inter pocula sensit\nEt male consessas maculauit sanguine mensas.\nAfrica per tantas periens non ulta rapinas\nSic mersa est. te exspectat inops. succurre gementi:\nNamque potes, uirtusque tibi iam nota per orbem est,\nEt uigilant sensus et claris dextera factis.'\nTalia commemorans referebat bella tribunus\nLumina conturbans lacrimis, Libycasque ruinas\nFataque cuncta ducum luctu deflebat amaro.\nIngemuit ductor concussa mente benignus.\nCongemuere duces: animis in proelia surgunt\nIndomitis. dolor atque pudor fera corda fatigat.\nTunc maculis tinxere genas, pallentque rubentque,\nNec latet ore furor. cunctantem surgere lucem\nIam cupiunt tardumque iubar noctemque queruntur.\nCaerula sulcabat dirumpens luce corusca\nPhoebus et errantes radios per nubila uibrans\nLumina subtremulis spargebat lampadis undis,\nSurgebatque dies miseris gratissimus Afris.\nIamque duces, uariis turbantes uocibus agmen,\nVrgebant fortesque uiros clarosque tribunos.\nQuisque suos hortatur agens. his castra mouere,\nArma parare iubent, iussa spectare magistri.\nSigna ferunt ornantque uiri gaudentque tuentes\nProspera discussis ludentia flamina uelis.\nAt pater exsurgens compuncta mente Iohannes,\nCorde pio, genibus nixis et poplite flexo,\nSuppliciter geminas tendens cum lumine palmas,\nOre canens haec uerba refert: 'tibi gloria, Christe,\nSumme parens, hominum linguis et pectore puro\nRite datur, laudesque libens gratesque resoluo.\nNon alium laudare uolo. tu conditor orbis,\nTu gentes et bella domas, tu conteris arma\nImpia, tu nostris solitus succurrere rebus.\nAspice succensas duris a gentibus urbes,\nOmnipotens, agrosque uide. iam nullus arator\nArua colit: lacrimas nullus per templa sacerdos\nPro populo iam ferre potest. nam montibus omnes\nVincula dura ferunt palmis post terga reuinctis.","prev":{"citation":"Iohannis 4.186-231","label":"Book 4, lines 4.186-4.231","url":"https://interlinea.aeterna-institute.org/library/latin/corippus/iohannis/4.186","api":"https://interlinea.aeterna-institute.org/api/v1/library/latin/corippus/iohannis/4.186"},"next":{"citation":"Iohannis 4.280-328","label":"Book 4, lines 4.280-4.328","url":"https://interlinea.aeterna-institute.org/library/latin/corippus/iohannis/4.280","api":"https://interlinea.aeterna-institute.org/api/v1/library/latin/corippus/iohannis/4.280"},"credit":{"text":"Corippus, Iohannis. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/CORIPP%7Cioha%7C000","quality":"proofread"}}