{"kind":"section","lang":"la","language":"Latin","title":"Iohannis 5.232-278","citation":"Corippus, Iohannis 5.232-278","ref":"5.232","level":null,"urn":null,"url":"https://interlinea.aeterna-institute.org/library/latin/corippus/iohannis/5.232","api":"https://interlinea.aeterna-institute.org/api/v1/library/latin/corippus/iohannis/5.232","markdown":"https://interlinea.aeterna-institute.org/library/latin/corippus/iohannis/5.232.md","author":{"name":"Corippus","url":"https://interlinea.aeterna-institute.org/library/latin/corippus"},"work":{"title":"Iohannis","url":"https://interlinea.aeterna-institute.org/library/latin/corippus/iohannis","urn":null},"verse":true,"words":284,"text":"Vt leo uenantum magno clamore coactus\nMontibus in mediis, stimulis et uerbere caudae\nAspera terga ciens in proelia suscitat iras,\nOre fremens, frangitque uiros uirtute potentes:\nCongreditur uiso nec territus hoste tribunus\nIrruit, infensoque uirum mucrone petebat.\nAnte sed oppositam transiuit lancea parmam,\nInque uiri costis lato stetit improba ferro.\nNascitur inde fragor: magnis montana resultant\nVocibus et fracto crudescit pugna tumultu.\nAntalae uirtus uenientis suscitat iras\nSpemque dedit uictis. iterum concurrere certant.\nAgmina densantur cuneis aciesque nouantur.\nIpse ubi collectis firmauit robora turmis,\nPer medios enses quatiens acerrimus hastam\nIrruit et densos uolitans perfertur in hostes.\nObuius ardenti primus sese obtulit Ornus,\nRomulea non gente satus, quem Persia mater\nEdidit ad bellum, rapuit tamen Africa matri\nAntalae superante manu. namque arduus hastam\nViribus intorquens clipeum transfixit et hostem.\nProtinus infelix, fatis oblatus iniquis,\nArsacis occurrit, crudo quem feruidus ense\nAntalas medium truncat, qua cingitur arcum,\nExtaque per geminas secuit spirantia partes.\nInde ferit pauidum conuersa cuspide Malcum,\nAttemiumque furens et duro nomine Maurum\nTransadigit socioque infixum deicit ictu.\nZudius eximiis longe praesumptior armis\nContempto pedes ibat equo turmasque tribunus\nHostiles sternebat ouans. iamque ille Misantan\nFuderat et Tiseran: Tiseras de plebe rebelli,\nMisantas pinnatus erat. tunc mittit ad umbras\nImmitem Sangin. tumidum compressit Amarum\nEt Garafin Tilifanque duos per uulnera fratres\nStrauit humi. frater morientem uidit uterque\nGermanum moriens. doluerunt pectora matris\nTempore tam longo tristes passura dolores.\nHunc procul ardentem cernens a colle Sidifan\nObuius ire parat. tunc Syrtica contrahit arma\nMagnanimumque petit feruentem caede tribunum,\nQuem numerus uirtusque premit. circumfluit hostis\nDensus et iniectis proturbant undique telis.\nInfigunt feriuntque uirum. tunc mille peremptum\nHostes uulneribus media strauere per arua.\nVerterat expulsis acies per deuia signis,\nImpuleratque duces terror post terga redire.","prev":{"citation":"Iohannis 5.186-231","label":"Book 5, lines 5.186-5.231","url":"https://interlinea.aeterna-institute.org/library/latin/corippus/iohannis/5.186","api":"https://interlinea.aeterna-institute.org/api/v1/library/latin/corippus/iohannis/5.186"},"next":{"citation":"Iohannis 5.279-325","label":"Book 5, lines 5.279-5.325","url":"https://interlinea.aeterna-institute.org/library/latin/corippus/iohannis/5.279","api":"https://interlinea.aeterna-institute.org/api/v1/library/latin/corippus/iohannis/5.279"},"credit":{"text":"Corippus, Iohannis. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/CORIPP%7Cioha%7C000","quality":"proofread"}}