{"kind":"section","lang":"la","language":"Latin","title":"Iohannis 7.232-276","citation":"Corippus, Iohannis 7.232-276","ref":"7.232","level":null,"urn":null,"url":"https://interlinea.aeterna-institute.org/library/latin/corippus/iohannis/7.232","api":"https://interlinea.aeterna-institute.org/api/v1/library/latin/corippus/iohannis/7.232","markdown":"https://interlinea.aeterna-institute.org/library/latin/corippus/iohannis/7.232.md","author":{"name":"Corippus","url":"https://interlinea.aeterna-institute.org/library/latin/corippus"},"work":{"title":"Iohannis","url":"https://interlinea.aeterna-institute.org/library/latin/corippus/iohannis","urn":null},"verse":true,"words":282,"text":"Scilicet infando tristantur pectora casu.\nArdet adire uiam, dilectas cernere turmas,\nOscula uel plantis optans libanda magistri,\nCunctaque disponit cura bene cautus in omni.\nPlaustra gemunt onerata uiis altisque camelis\nFeruet iter: ferrum resonantia concutit aera.\nOmnia per latos conuectant horrea campos\nArmaque multa uiris more expendenda Latinis.\nIamque duces hinc inde ruunt fortesque tribuni\nVictricesque ferunt aquilas atque agmina densant.\nMittitur et sollers geminas componere partes\nStephanides iuuenis discreta mente Iohannes.\nNamque inter sese duri iam semina belli\nSaeuus Ifisdaias et fidus Cusina iunctis\nTunc habuere odiis. bellum iam corda futurum\nCoeperat alterno succendere barbara motu,\nInuidia geminante iras. hunc ergo magister\nInter utrumque iubet placidam componere pacem\nEt sedare uiros ipsasque arcessere gentes\nSubsidio rerum. nec duras flectere mentes\nAut animos alius posset placare feroces.\nHic poterat rabidas uerbis mansuescere tigres\nAtque feros facili mulcens sermone leones\nSerpentumque malum dictis arcere uenenum.\nDistulit + ille tamen + alterna parte furentes\nCompressitque nefas et pactum gentibus auxit\nArte noua. quos saepe metus, quos ille labores\nInter utrumque tulit, tantas dum flecteret iras!\nPro patria libuit tot saeua pericula ferre.\nComposuit gentes pariterque ad proelia mouit.\nConuenit ergo fremens, uariis ornatus in armis,\nInnumerasque acies Maurorum in proelia ductor\nCusina fidus agit. commotis omnia cannis\nArua gemunt: solidant latos uestigia campos.\nIlle duces proprios triginta fortior armat:\nEt quamuis numero milleni quemque sequantur,\nRomanis gaudet sese tamen esse magister\nMilitibus medium, quos princeps maximus orbis\nIpse dedit pacis socios pugnaeque ministros.\nIllis fretus erat gentesque et bella domabat.\nVenit Ifisdaias centum cum milibus ardens,\nArsuris(==) (==A+ACIC) et latos impleuit tarua(==TA+RUA) campos:\nSed numerus uirtute minor. + tamen ornat + in armis,\nHostiles acies uisu terrente, per hostes\nProelia dum miscet densis asperrima telis.","prev":{"citation":"Iohannis 7.186-231","label":"Book 7, lines 7.186-7.231","url":"https://interlinea.aeterna-institute.org/library/latin/corippus/iohannis/7.186","api":"https://interlinea.aeterna-institute.org/api/v1/library/latin/corippus/iohannis/7.186"},"next":{"citation":"Iohannis 7.277-322","label":"Book 7, lines 7.277-7.322","url":"https://interlinea.aeterna-institute.org/library/latin/corippus/iohannis/7.277","api":"https://interlinea.aeterna-institute.org/api/v1/library/latin/corippus/iohannis/7.277"},"credit":{"text":"Corippus, Iohannis. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/CORIPP%7Cioha%7C000","quality":"proofread"}}