{"kind":"section","lang":"la","language":"Latin","title":"Iohannis 7.367-411","citation":"Corippus, Iohannis 7.367-411","ref":"7.367","level":null,"urn":null,"url":"https://interlinea.aeterna-institute.org/library/latin/corippus/iohannis/7.367","api":"https://interlinea.aeterna-institute.org/api/v1/library/latin/corippus/iohannis/7.367","markdown":"https://interlinea.aeterna-institute.org/library/latin/corippus/iohannis/7.367.md","author":{"name":"Corippus","url":"https://interlinea.aeterna-institute.org/library/latin/corippus"},"work":{"title":"Iohannis","url":"https://interlinea.aeterna-institute.org/library/latin/corippus/iohannis","urn":null},"verse":true,"words":284,"text":"Sed tamen infensas urgens timor ire cateruas\nPer deserta iubet. nec iam sua castra locare\nPermittit terror, sed longas pellit ad oras\nMassylas gentes. bis quinis Africus ingens\nAuxerat igniuagis exurens cuncta procellis:\nTot fugiens hostes acies inimica diebus\nSe procul a fessis posuit terrore Latinis.\nDuctoris iussu hostes explorare tribunus\nCaecilides numero pariter comitante feroci\nVectorum egreditur, quibus hic uirtute placebat.\nForma uiri magno fuerat iam nota magistro,\nNon minor Herculeis prosternens uiribus hostes.\nHic leuitate celer, nimia uirtute tremendus,\nConsilio maturus erat. Maurusia quamquam\nObsidione uias gens aspera clauserat omnes,\nIlle tamen melior cautis percusserat armis\nSaepe feras gentes. tremuit prostratus Ilaguas\nMarte uirum, tremuit Frexes et Naffur anhelus.\nVandalicae gentis timuit hunc ille tyrannus,\nDiligit hunc fortem nimium pater ipse magister.\nIpse laborantem propriis prospexit in armis\nSaepe uirum: captos suscepit Marte rebelles\nIllius e manibus. nouit Romana iuuentus\nFortia facta uiri, tantis gauisa tropaeis.\nErgo missus abit. Iunci populator iniquus\nArua tenens uicina mari, securus et errans\nOmnia summissis urebat praedia flammis.\nCeperat ille suas noctis per opaca latebras,\nSollicitaeque celer successit moenibus urbis\nHostes per medios: tanta est fiducia ferri.\nNon ignota cano. timuit non ille periclum\nPro patria superare sua. sic iussa magistri\nPerficere et tantos potuit sufferre labores.\nIngreditur portas, hostis secreta requirit,\nCircuit hostiles digressus in ordine fossas,\nCognoscitque locos per amica silentia lustrans.\nHinc redit ad socios: magnum petit <inde> magistrum.\nIamque per innumeras euaserat ipse cateruas\nPraedonum impauidus. postquam tentoria longe\nMarmaridum uidit saeuaeque pericula gentis\nNon super esse suis, et passim comperit hostes\nDeuastare locos, animus consurgit in iram,\nEt sociis sic orsus ait: \"si dicta feremus\nSola duci, non plena fides est. nam loca tantum\nQuae teneant fossae, cuncti nos scire fatemur.","prev":{"citation":"Iohannis 7.323-366","label":"Book 7, lines 7.323-7.366","url":"https://interlinea.aeterna-institute.org/library/latin/corippus/iohannis/7.323","api":"https://interlinea.aeterna-institute.org/api/v1/library/latin/corippus/iohannis/7.323"},"next":{"citation":"Iohannis 7.412-458","label":"Book 7, lines 7.412-7.458","url":"https://interlinea.aeterna-institute.org/library/latin/corippus/iohannis/7.412","api":"https://interlinea.aeterna-institute.org/api/v1/library/latin/corippus/iohannis/7.412"},"credit":{"text":"Corippus, Iohannis. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/CORIPP%7Cioha%7C000","quality":"proofread"}}