{"kind":"section","lang":"la","language":"Latin","title":"Romulea 10.1-46","citation":"Dracontius, Romulea 10.1-46","ref":"10.1","level":null,"urn":null,"url":"https://interlinea.aeterna-institute.org/library/latin/dracontius/romulea/10.1","api":"https://interlinea.aeterna-institute.org/api/v1/library/latin/dracontius/romulea/10.1","markdown":"https://interlinea.aeterna-institute.org/library/latin/dracontius/romulea/10.1.md","author":{"name":"Dracontius","url":"https://interlinea.aeterna-institute.org/library/latin/dracontius"},"work":{"title":"Romulea","url":"https://interlinea.aeterna-institute.org/library/latin/dracontius/romulea","urn":null},"verse":true,"words":304,"text":"Fert animus uulgare nefas et uirginis atrae\ncaptiuos monstrare deos, elementa clientes,\nnaturam seruire reae, seruire puellae,\nastra poli et Phoebi cursus et sidera caeli\narbitrio mulieris agi, pendere Tonantem,\nquod iubeat Medea nefas, ubi mittere flammas\nimperet aethereas. Penetrat uox illa per auras,\ncum uitas mortesque facit, cum fata retorquet\nad cursus quoscunque uelit. Licet hospite caeso\nseruiat et Scythicae currat per templa Dianae,\npossidet astrigerum funesto pectore caelum\net superos impune premit prece nixa uirago\ninuitos parere sibi. Quae carmina linguis\nmurmuret aut urens species quae nomina dicat,\nhaec uatem nescire decet; quae nosse profanum est,\nquod fuerit uulgasse nefas. Nos illa canemus,\nquae solet in lepido Polyhymnia docta theatro\nmuta loqui, cum nauta uenit, cum captus amatur\ninter uincla iacens mox regnaturus Iason;\nuel quod grande boans longis sublata cothurnis\npallida Melpomene, tragicis cum surgit iambis,\nquando cruentatam fecit de matre nouercam\nmixtus amore furor dotata paelice flammis,\nsquamea uiperei subdentes colla dracones\ncum rapuere rotis post funera tanta nocentem.\nTe modo, Calliope, poscunt optantque sorores:\ndulcior ut uenias (nec te decet ire rogatam)\nad sua castra petunt. Lauro succincta poetae\nPegaseo de fonte ueni, quo rore medullas\net sensus infunde meos. Cur hospes amatur,\nqui mactandus erat, uel cur mactatur amatus?\nDiues apud Colchos Phrixei uelleris aurum,\npellis erat, seruata diu custode dracone.\nHanc propter pelagi temerator primus Iason\nuenerat, ut rutilas subduceret arbore lanas.\nVt Scytha conspexit Graiam de litore puppim\nire per undosum proscissis fluctibus aequor,\nexpauit, nam monstra putat: quis crederet unquam\nper freta, per rabidas hominem transire procellas?\nBarbarus ignaro regi iam nuntius ibat,\nquae noua perferret pelagus; sed callidus heros\nsolus Iason adhuc uento currente carina\nprosilit in fluctus et litora uisa natatu\nnudatus ceu nauta petit. Sed Colchus alumnus,\nnuntius ille redit secum comitante iuuenta,\nut nossent quid puppis erat, quid uela, quid arbor.","prev":{"citation":"Romulea 9.180-231","label":"Lines 9.180-9.231","url":"https://interlinea.aeterna-institute.org/library/latin/dracontius/romulea/9.180","api":"https://interlinea.aeterna-institute.org/api/v1/library/latin/dracontius/romulea/9.180"},"next":{"citation":"Romulea 10.47-93","label":"Lines 10.47-10.93","url":"https://interlinea.aeterna-institute.org/library/latin/dracontius/romulea/10.47","api":"https://interlinea.aeterna-institute.org/api/v1/library/latin/dracontius/romulea/10.47"},"credit":{"text":"Dracontius, Romulea. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/DRAC%7Cromu%7C001","quality":"proofread"}}