{"kind":"section","lang":"la","language":"Latin","title":"Romulea 10.421-466","citation":"Dracontius, Romulea 10.421-466","ref":"10.421","level":null,"urn":null,"url":"https://interlinea.aeterna-institute.org/library/latin/dracontius/romulea/10.421","api":"https://interlinea.aeterna-institute.org/api/v1/library/latin/dracontius/romulea/10.421","markdown":"https://interlinea.aeterna-institute.org/library/latin/dracontius/romulea/10.421.md","author":{"name":"Dracontius","url":"https://interlinea.aeterna-institute.org/library/latin/dracontius"},"work":{"title":"Romulea","url":"https://interlinea.aeterna-institute.org/library/latin/dracontius/romulea","urn":null},"verse":true,"words":295,"text":"qui mecum feriendus erat; cuicunque iubebis,\ncolla paro feriat, tantum ne uirgo Creontis\ndiscidium pariat nautam ductura maritum.\nExaudi famulam: dolor est, non zelus Iason.\nQuinque dabo inferias (sat erunt pro crimine nostro\nillustres animae): niueam cum Iasone Glaucem,\nmortibus amborum regem superaddo Creonta\net natos miseranda duos, mea pignora, supplex\noffero, sacrilegos nostro de corpore fructus,\nne prosit peccasse mihi\". Sic fata sacerdos\nsuspexit non ire polos nec Luna uidetur\nsic tauros urgere suos, sed cursibus astra\nignitis responsa dabant. Gauisa sacerdos\nuertit ad infernum gemitus regemque barathri\nsecura iam uoce ciet Furiasque precatur:\n\"Impie rex Erebi, qui formidabile regnum\nMortis habes, quem terra premit, qui funera mundi\nexcipis et tantis non exples luctibus aulam;\nanguicomae uos quoque deae, quibus (impius horror!)\nturpia uipereae funduntur membra cerastae\n(plurimus ora tegit pendens de uertice serpens\net sinuant orbes per pallida colla dracones):\nsi manibus laniata meis mala uictima uestros\nad manes peruenit homo, si uiscera matris\nuos propter scindens homines in uentre necaui,\nnunc nostras audite preces. Regnator Auerni,\ncrastina cum Glauce ueniet nuptura marito,\nmox Furias admitte tuas; properate, sorores\nTartareae: Thebis iterum iam uota geruntur,\ncurrite, per thalamos Iocastae frater et heres\nconiungit natam. Gens <haec> est uestra: dicauit\nmortibus impietas, affectus funera praestant.\nCur mora? Nam nihil est quod non me exaudiat unquam.\nVirginitas si casta placet, retinere pudorem\nsi libet et nunquam contagia blanda mariti\nquaeritis, innuptae nuptam exhorrete sorores.\nSi Furias saeuire precor nec sponte nocetis,\nnon estis Furiae: nomen mutate domosque,\nponite serpentes, alienas reddite flammas\net puerum Veneris, quem iam tempsistis, amate\".\nDixerat et terra spatium tremibunda ciebat:\nquo steterat Medea loco, telluris hiatus\nfinditur. Attonitas inclinat cautior aures\net surgens: \"Audimur\", ait, \"nam terra tremescit,\nuerbera plaudentum resonant per inane sororum,\nsibila uipereis uibrant sub dentibus angues.","prev":{"citation":"Romulea 10.367-420","label":"Lines 10.367-10.420","url":"https://interlinea.aeterna-institute.org/library/latin/dracontius/romulea/10.367","api":"https://interlinea.aeterna-institute.org/api/v1/library/latin/dracontius/romulea/10.367"},"next":{"citation":"Romulea 10.467-509","label":"Lines 10.467-10.509","url":"https://interlinea.aeterna-institute.org/library/latin/dracontius/romulea/10.467","api":"https://interlinea.aeterna-institute.org/api/v1/library/latin/dracontius/romulea/10.467"},"credit":{"text":"Dracontius, Romulea. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/DRAC%7Cromu%7C001","quality":"proofread"}}