{"kind":"section","lang":"la","language":"Latin","title":"Romulea 2.131-163","citation":"Dracontius, Romulea 2.131-163","ref":"2.131","level":null,"urn":null,"url":"https://interlinea.aeterna-institute.org/library/latin/dracontius/romulea/2.131","api":"https://interlinea.aeterna-institute.org/api/v1/library/latin/dracontius/romulea/2.131","markdown":"https://interlinea.aeterna-institute.org/library/latin/dracontius/romulea/2.131.md","author":{"name":"Dracontius","url":"https://interlinea.aeterna-institute.org/library/latin/dracontius"},"work":{"title":"Romulea","url":"https://interlinea.aeterna-institute.org/library/latin/dracontius/romulea","urn":null},"verse":true,"words":220,"text":"Deiopea tamen cunctas hortata sorores\nalloquitur puerum: \"Non te decet ora rigare\nfletibus, alme puer; ploret deformis imago,\nnon est flere tuum. Mundum tibi nullus ademit:\nnos rosa, nos uiolae, nos lilia pulchra coronant,\nnos Hyacinthus amat, noster Narcissus ab undis,\nfontigenis dat serta comis redimitque capillos\nquicquid floris olet, quicquid dant prata ru<boris>.\nTu noster iam sponsus eris sine fine dierum.\"\nHis dictis mentem pueri mulcebat amica.\nInterea furibundus adhuc Tirynthius ibat\net clamans quaerebat Hylan; cui litus et unda\nHerculea cum uoce sonant et nomen amati\nmontes, silua uocant; tantum fons ille tacebat,\nin quo raptus Hylas. Cum iam remearet ad <astra>\npost factum pinnatus Amor matrique triumphum\napportaret ouans, uocem deus Herculis hausit\net gemitus quaerentis Hylan. Cui gesta fatetur,\nAlcidis comitem fontis rapuisse puellas,\nignibus Idaliis exustas Herculeas spes.\nObriguit gemuitque simul clauamque remisit:\n\"O frustra nutrite, puer, spectator ubique\nuirtutis per cuncta meae (te teste pericla\nsaepe tuli, cum uictus aper, cum fracta leonis\ncolla Cleonaei telo parcente necantur,\ncum simul Antaeum rapui Telluris alumnum):\nquis mihi sudorem lasso post proelia terget?\nQuis comes alter erit cum dat fera bella nouerca?\nQuid matri narrabo tuae, quae te mihi paruum\ndeposuit pietatis inops? Quae pignora reddam\ncum conuentus ero? Dicam tamen ipse parenti:\n\"Exulta, genetrix, nimium laetare, beata\nante parens hominis, pulchri modo numinis auctor\".","prev":{"citation":"Romulea 2.88-130","label":"Lines 2.88-2.130","url":"https://interlinea.aeterna-institute.org/library/latin/dracontius/romulea/2.88","api":"https://interlinea.aeterna-institute.org/api/v1/library/latin/dracontius/romulea/2.88"},"next":{"citation":"Romulea 3","label":"Poem 3","url":"https://interlinea.aeterna-institute.org/library/latin/dracontius/romulea/3","api":"https://interlinea.aeterna-institute.org/api/v1/library/latin/dracontius/romulea/3"},"credit":{"text":"Dracontius, Romulea. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/DRAC%7Cromu%7C001","quality":"proofread"}}