{"kind":"section","lang":"la","language":"Latin","title":"Romulea 2.45-87","citation":"Dracontius, Romulea 2.45-87","ref":"2.45","level":null,"urn":null,"url":"https://interlinea.aeterna-institute.org/library/latin/dracontius/romulea/2.45","api":"https://interlinea.aeterna-institute.org/api/v1/library/latin/dracontius/romulea/2.45","markdown":"https://interlinea.aeterna-institute.org/library/latin/dracontius/romulea/2.45.md","author":{"name":"Dracontius","url":"https://interlinea.aeterna-institute.org/library/latin/dracontius"},"work":{"title":"Romulea","url":"https://interlinea.aeterna-institute.org/library/latin/dracontius/romulea","urn":null},"verse":true,"words":289,"text":"At his laeta Venus uultu mutata renarrat:\n\"Impubes lasciue, puer cui subiacet omne\nquod natura creat, caelum, mare, sidera, tellus,\nnemo notet Venerem, quod supplex mater Amorum\nignis opem de prole rogat, nam munere in isto\nquamuis sit communis honor, tamen, alme, fatemur\nhic numen plus posse tuum. Lamenta parentis\nsi placet ulcisci, paucis (aduerte) docebo.\nNympharum, puer alme, chorus dum pensa reuoluit\nPenei sub fonte sui (pudet ore referre),\nSolis amata canit Clymene mea crimina Nymphis\nmeque suo prensam Nymphas monet indice Sole,\nVulcanique sonat captiuo Marte catenas.\nQuas audire libet de nostra clade canentem.\nSed si de nobis certe cantare placebat,\niudicium Paridis uel nostros, nate, triumphos\ncantarent fluidae carpentes pensa puellae.\nEst gemitus haec causa mei. Quas ure sagittis,\ncorda uel illarum dulci continge ueneno:\nnoscant quid sit amor, discant tua tela <uereri>.\nAlcidis comes est comis puerilibus annis,\nquem rubor ut roseus sic candor lacteus ornat;\nilli purpureus niueo natat ignis in ore.\nHoc puero uiso Nympharum turba calescat;\nhaec illis sit poena nocens, ut uota trahantur\nipsarum in longum, donec pubescat amatus\".\nIret adhuc in uerba dolor, ni penniger audax\ndimittens matrem fricuisset cote sagittas.\nArcu cinctus erat, dantur post terga pharetrae,\naccipit et flammas hominum diuumque uoluptas.\nEuolat armatus. Vix caelum liquerat ales\niamque tenet terras: sic currit mentis acumen.\nVt uenit ad fontem, lapidem proiecit in undas.\nConcussit uitreo sonitus sub fonte puellas:\nexiliunt cunctae, quaerunt quae causa quietas\nsollicitet. Volucer fugiens nemus intrat opacum\nmoxque dei uultus uestiuit imago Naidis;\ntendit membra puer, longos ut crescat in artus,\nut possit complere dolos ac iussa parentis;\n<usque> pedes fluitans uestis laxatur ad imos,\ncandida diffusi ludunt per colla capilli\net uento crispante gradu coma fluctuat acta,\nfrons nudata decet diuiso fulgida crine;","prev":{"citation":"Romulea 2.1-44","label":"Lines 2.1-2.44","url":"https://interlinea.aeterna-institute.org/library/latin/dracontius/romulea/2.1","api":"https://interlinea.aeterna-institute.org/api/v1/library/latin/dracontius/romulea/2.1"},"next":{"citation":"Romulea 2.88-130","label":"Lines 2.88-2.130","url":"https://interlinea.aeterna-institute.org/library/latin/dracontius/romulea/2.88","api":"https://interlinea.aeterna-institute.org/api/v1/library/latin/dracontius/romulea/2.88"},"credit":{"text":"Dracontius, Romulea. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/DRAC%7Cromu%7C001","quality":"proofread"}}