{"kind":"section","lang":"la","language":"Latin","title":"Romulea 2.88-130","citation":"Dracontius, Romulea 2.88-130","ref":"2.88","level":null,"urn":null,"url":"https://interlinea.aeterna-institute.org/library/latin/dracontius/romulea/2.88","api":"https://interlinea.aeterna-institute.org/api/v1/library/latin/dracontius/romulea/2.88","markdown":"https://interlinea.aeterna-institute.org/library/latin/dracontius/romulea/2.88.md","author":{"name":"Dracontius","url":"https://interlinea.aeterna-institute.org/library/latin/dracontius"},"work":{"title":"Romulea","url":"https://interlinea.aeterna-institute.org/library/latin/dracontius/romulea","urn":null},"verse":true,"words":286,"text":"et uelut inuitos gressus pudibunda mouebat\nincedens fluxoque latent sub tegmine pinnae.\nMisceturque puer Nymphis sub fronte puellae\net causas perquirit Amor, cur fonte relicto\nterras cauta petit; facilis cui turba fluenti\nrem pandit; periurat Amor, quasi nescius esset.\nInterea post bella suis Tirynthius ibat\nuictor ouans, cui iunctus Hylas pulcherrimus haeret\ngestans fulminei pellem cum dentibus apri;\net licet inualidus haec pondera ferre laborat,\nipse tamen gaudet, quasi iam commune triumphum\ngestet et Alcides non solus fuderit aprum.\nHorrent Alciden Nymphae mirantur Hylanque.\nEx quibus una tamen cunctas affata sorores\nhaec ait: \"O faciles Penei numina Nymphae,\ndicite, quando parem puero natura dedisset.\nNon fuit Hippolytus talis, non pastor ab Ida,\nnocturnae fulgore deae non pulcher Iason;\nnec Bromius iam talis erat nec magnus Apollo.\nFelix sorte sua, cui talis semper imago\nseruiet et roseis recubans dabit oscula labris\".\nCum nimium laudatur Hylas, se subtrahit ales\net profert arcum; permiscens mella uenenis\narmat tela dolis et spargit spicula Nymphis:\npallescunt omnes, subitus rubor inficit ora,\ntendunt membra simul, cunctis respirat hiatus\noris et ad crines digiti mittuntur amantum,\nincipiunt fari mediaque in uoce resistunt;\ntot signis uulgatur amor. Clymeneque sorores\nalloquitur: \"Placet almus Hylas rapiatur in undas,\nut sit noster amor. Nec erit mihi crimen amanti:\nOenone Paridem, Lycastum zelat Amazon,\npulcher amatur Adon, Furias amat ipse Cupido;\nquod caelum, quod terra, fretum, quod sidera, Pluton\nexercent per saecla diu, cur Nympha ueretur?\"\nCum loquitur, cantabat Hylas fontemque petebat\nhauriturus aquas. Vrnam licet ipse tenebat,\nut puer est uisus, faciles risere puellae\net lentum uenisse putant. Placet omnibus idem,\nuix urnam summisit aquis dextramque tetendit.\nCum quo se Nymphae pariter mersere sub undas.\nExpauit sic raptus Hylas pauidusque petebat\nherbida quod uitreum tellus perfuderat antrum.","prev":{"citation":"Romulea 2.45-87","label":"Lines 2.45-2.87","url":"https://interlinea.aeterna-institute.org/library/latin/dracontius/romulea/2.45","api":"https://interlinea.aeterna-institute.org/api/v1/library/latin/dracontius/romulea/2.45"},"next":{"citation":"Romulea 2.131-163","label":"Lines 2.131-2.163","url":"https://interlinea.aeterna-institute.org/library/latin/dracontius/romulea/2.131","api":"https://interlinea.aeterna-institute.org/api/v1/library/latin/dracontius/romulea/2.131"},"credit":{"text":"Dracontius, Romulea. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/DRAC%7Cromu%7C001","quality":"proofread"}}