{"kind":"section","lang":"la","language":"Latin","title":"Romulea 4","citation":"Dracontius, Romulea 4","ref":"4","level":null,"urn":null,"url":"https://interlinea.aeterna-institute.org/library/latin/dracontius/romulea/4","api":"https://interlinea.aeterna-institute.org/api/v1/library/latin/dracontius/romulea/4","markdown":"https://interlinea.aeterna-institute.org/library/latin/dracontius/romulea/4.md","author":{"name":"Dracontius","url":"https://interlinea.aeterna-institute.org/library/latin/dracontius"},"work":{"title":"Romulea","url":"https://interlinea.aeterna-institute.org/library/latin/dracontius/romulea","urn":null},"verse":true,"words":358,"text":"Iuppiter omnipotens, celsi moderator Olympi,\ncur mihi uiperei fetus mala fata minantur?\nTe regnante, parens, in me coniurat iniqua\n<serpe>ntum cristata manus; sed forte superbi\n<nunc> caelum, terras, pontum, fulmenque trisulcum\n<her>edes et Iuno tenent, seu fulgidus ortu\n<desilis> ad terras, seu iam defessus anheli\nsideris occasu maestus tua regna relinquis.\nPaenitet, alme parens, uestra de stirpe creatum\nAlciden, quia nullus honos et mille pericla.\nNam quodcumque malum superas euincit in auras,\nHerculis hostis erit. Per nos nam bella geruntur,\nIuno nouerca furens potuit quae uicta parare\npriuigno (natum quem comprobat esse Tonantis,\ndum nobis immensa iubet); me quoque triumphis\nhorrida bella manent, et nunquam stare licebit\nhoste sine, trucibusque diu concurrere monstris\ncompellor. Genitor, te in nosmet pessima coniux\nhorrescit: misero semper tu causa pericli es.\nNam mihi reptanti tumida ceruice dracones\nIuno duos misit, quis frontem crista tegebat,\nflammea lux oculis, pro spumis taetra uenena,\nsibila uibrabant linguis sub dente trisulcis:\nterror erat uisus cunctis sonitusque draconum.\nQuos manibus ridens compressi paruulus ambos.\nHi tribuere mihi primum pro morte triumphum\net letum, non praeda fui Iunonis alumnis.\nHostes deesse mihi dixi post bella leonis,\nquem nullo mucrone peti nec retibus ullis\nimplicui: fretus manibus nec Maurus ad illum,\ncuius pelle tegor. Nunc fortiter ecce tabescens\ntertia bella gero, quae caedes passa resurgunt.\nEn totiens percussa lues magis extitit ardens\net nunquam sternenda uenit. Pro fata nefanda,\nuincere peius erit: propriis nam uiribus ipse\nimpugnor. Saeuos gladius mihi suggerit hostes,\nnon rapit ecce meus, sed proelia uicta reformat.\nHuc quicunque deus frater mihi summus Olympo es,\nhuc ades et miseri tandem succurre periclis;\nsed quaeso uenias soboles ut nulla nouercae,\nquamuis sis frater. Iam tu succurre, Minerua\nbellipotens, patrius cui casside fulgurat ardor,\nquae clipeo rutilante tonas, quae fulmina uibras,\npectore saxifico cui militat impia Gorgon.\nIntemerata soror de uertice missa Tonantis,\nsudori succurre meo. Quibus artibus angues\nextinguam, qui sponte petunt mucronis acumen?\nVt crescunt gaudentque mori fera colla draconum!\nCaesa uigent, alter surgit de uulnere serpens.\nConsilium mihi uirgo dedit: \"Quia mucro laborat\nincassum, gelida flammis exure uenena\net praestent cum morte rogos; caput omne perurat\nignis edax anguesque crement post uulnera flammae\".","prev":{"citation":"Romulea 3","label":"Poem 3","url":"https://interlinea.aeterna-institute.org/library/latin/dracontius/romulea/3","api":"https://interlinea.aeterna-institute.org/api/v1/library/latin/dracontius/romulea/3"},"next":{"citation":"Romulea 5.1-43","label":"Lines 5.1-5.43","url":"https://interlinea.aeterna-institute.org/library/latin/dracontius/romulea/5.1","api":"https://interlinea.aeterna-institute.org/api/v1/library/latin/dracontius/romulea/5.1"},"credit":{"text":"Dracontius, Romulea. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/DRAC%7Cromu%7C001","quality":"proofread"}}