{"kind":"section","lang":"la","language":"Latin","title":"Romulea 5.129-172","citation":"Dracontius, Romulea 5.129-172","ref":"5.129","level":null,"urn":null,"url":"https://interlinea.aeterna-institute.org/library/latin/dracontius/romulea/5.129","api":"https://interlinea.aeterna-institute.org/api/v1/library/latin/dracontius/romulea/5.129","markdown":"https://interlinea.aeterna-institute.org/library/latin/dracontius/romulea/5.129.md","author":{"name":"Dracontius","url":"https://interlinea.aeterna-institute.org/library/latin/dracontius"},"work":{"title":"Romulea","url":"https://interlinea.aeterna-institute.org/library/latin/dracontius/romulea","urn":null},"verse":true,"words":287,"text":"Victoris genio sanie cum tabe litetur?\nQuaere sacerdotem: ueniet crudelis Erictho,\nhaec est apta tuis antistita saeuior aris,\nquae calidas rapiat fibras pulmonis anheli,\nsorbeat ereptum uel morsibus illa cruentis\nuel uiuente iecur, uel cor cum palpitat intret\ndentibus obscaenis, lingua lambente palatum\nprostrati ciuis. Haec sint tua munera, uictor?\nHostia talis eat, talis tibi uictima pergat?\nSit tua terribilis Phalaris ceu taurus imago?\nTaurica crudelis mitis tamen ara Dianae\nnec Busiris atrox Aegyptius ille cruentus:\nsolus enim per templa deum sine morte propinqui\nsacra peregrinus funestat <et> aduena tantum,\nillaesus nam ciuis erat. Tu, uictor, inique,\nSardorum qui sacra probas et moenia foedas\nlauro cincta tua, uestris ornata coronis.\nInsula delubris natorum colla secabat,\nuerticis unde comam uera pietate parentes\nillaesa ceruice metunt. Carthago duorum\nannua nobilium praestabat funera templis\nSaturnoque seni pueros mactabat ad aras.\nTristia plangentum foedabant ora parentum.\nHoc uir fortis agis? Rapientur uiscera matri\net perit ante oculos genitoris pignus amatum\naut populo spectante cadet? Cum Troia periret,\nfilius Aeacidis uel uindex Pyrrhus Achillis\nante oculos Priami percussit nocte Politen,\nbelli iure furens. Tamen ultio digna relata est:\nipse Neoptolemus iacuit percussus ad aras.\nQualiter en pietas se uindicat, impie uictor!\nQuid matris Patriae uenerandam polluis arcem?\nIn qua templa sedent, ubi numina saepe precati\nfleximus, ut sospes rediens et uictor in armis\ncaptiuos post bella trahens ex uulnere lassos\nintrares patriam, ne saeuus uinceret hostis,\nqui scandens muros ciues laniaret in urbe.\nHoc matres puerique rogant, hoc ipsa senectus,\nuirginitas hoc casta petit, hoc pauper adorat.\nSi potuit, uoluisse puta. Nam uita potentis\nnon iacet insidiis nisi diuitis atque propinqui\naut certe si sceptra uigent sub regis auari\nimperio. Fortem timidus formidat et horret,\nnon fortis lassum timuit nec diues egentem.","prev":{"citation":"Romulea 5.87-128","label":"Lines 5.87-5.128","url":"https://interlinea.aeterna-institute.org/library/latin/dracontius/romulea/5.87","api":"https://interlinea.aeterna-institute.org/api/v1/library/latin/dracontius/romulea/5.87"},"next":{"citation":"Romulea 5.173-217","label":"Lines 5.173-5.217","url":"https://interlinea.aeterna-institute.org/library/latin/dracontius/romulea/5.173","api":"https://interlinea.aeterna-institute.org/api/v1/library/latin/dracontius/romulea/5.173"},"credit":{"text":"Dracontius, Romulea. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/DRAC%7Cromu%7C001","quality":"proofread"}}