{"kind":"section","lang":"la","language":"Latin","title":"Romulea 5.218-261","citation":"Dracontius, Romulea 5.218-261","ref":"5.218","level":null,"urn":null,"url":"https://interlinea.aeterna-institute.org/library/latin/dracontius/romulea/5.218","api":"https://interlinea.aeterna-institute.org/api/v1/library/latin/dracontius/romulea/5.218","markdown":"https://interlinea.aeterna-institute.org/library/latin/dracontius/romulea/5.218.md","author":{"name":"Dracontius","url":"https://interlinea.aeterna-institute.org/library/latin/dracontius"},"work":{"title":"Romulea","url":"https://interlinea.aeterna-institute.org/library/latin/dracontius/romulea","urn":null},"verse":true,"words":287,"text":"exul et extorris meruit de clade triumphum.\nMentibus ingenuis semper pro lege tenete:\nsolliciti ueniam debent sperare potentes,\nsecuri ne regna petant. Das otia seruo:\nmox liber uult esse suus. Iam nemo quietus\ndiuitis insidiis durabit paupere caeso.\nSi leges tractare placet, ueniatur ad illas:\n\"Accipiat quodcunque uelit uir fortis et optet\".\nHoc cupit et pauper, pro uoto diuitis instat,\nut maneat lex lata rogat. Venialis imago\naut ualet aut certe simulacrum lege perempta.\nInterea non aera micent, non marmora surgant\nnec sub lege pia fortis noua praemia quaerat,\nquae damnat mox sponte sua. Non summouet unquam\nlegis cauta furor, quam dant pro laude triumphi.\nInstar habent hostis quos sanctio nulla coercet.\nCondemnat solus ciuilia iura tyrannus.\nNonne triumphantis legem si forte superbus\ntemneret aut parui pendens quicunque negaret,\nsacrilegus temerator, iners inimicus et hostis\npublicus ille foret? Legum secreta tribunal\niam quateret strepitu iuuenis, fora nostra creparent,\nipse cicatrices subducta fronte recentes\npectoris effossi populo monstraret et urbi,\n\"Virtutis laesae grauis est iniuria Marti\"\nclamaret per templa Iouis, per templa Mineruae,\n\"nemo aciem subeat, nullus prorumpat in hostem\"\ndiceret, infremerent omnes uno agmine ciues.\nPauperis, o proceres, languentia colla sinetis\ncarnificis truncare manum. Non arma tubasque\ntollitis et saltem ciuilia bella mouetis?\nQuid, plebs nostra, taces? Diues praeiudicat urbi\net pariter tua iura negat. Praescriptio surgit,\nquae populo uitam libertatemque negabit.\nNon gemitis, non fletis adhuc, non arma paratis?\nLaudis erit, fateor, pro libertate perire:\nnam pro Verginia cum plebs arderet in ira\nmontis Auentini tenuit Romana cacumen,\ncum pater egregiam prostrauit morte puellam\nimpietate pius ne Claudius esset adulter.\nNec populus liber capto de monte rediret,\nplebs nisi sumpsisset cum libertate triumphum.\nVidimus, o ciues, fugientis pauperis ora\ncum manibus quaesisset opem sine uoce rogantis.","prev":{"citation":"Romulea 5.173-217","label":"Lines 5.173-5.217","url":"https://interlinea.aeterna-institute.org/library/latin/dracontius/romulea/5.173","api":"https://interlinea.aeterna-institute.org/api/v1/library/latin/dracontius/romulea/5.173"},"next":{"citation":"Romulea 5.262-305","label":"Lines 5.262-5.305","url":"https://interlinea.aeterna-institute.org/library/latin/dracontius/romulea/5.262","api":"https://interlinea.aeterna-institute.org/api/v1/library/latin/dracontius/romulea/5.262"},"credit":{"text":"Dracontius, Romulea. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/DRAC%7Cromu%7C001","quality":"proofread"}}