{"kind":"section","lang":"la","language":"Latin","title":"Romulea 5.262-305","citation":"Dracontius, Romulea 5.262-305","ref":"5.262","level":null,"urn":null,"url":"https://interlinea.aeterna-institute.org/library/latin/dracontius/romulea/5.262","api":"https://interlinea.aeterna-institute.org/api/v1/library/latin/dracontius/romulea/5.262","markdown":"https://interlinea.aeterna-institute.org/library/latin/dracontius/romulea/5.262.md","author":{"name":"Dracontius","url":"https://interlinea.aeterna-institute.org/library/latin/dracontius"},"work":{"title":"Romulea","url":"https://interlinea.aeterna-institute.org/library/latin/dracontius/romulea","urn":null},"verse":true,"words":285,"text":"Diximus: \"Hostis adest. Veniat uir fortis et adsit,\ncuius inops simulacra tenet, cui crura lacertis\ncinxit et ad plantas prostratus plangit egenus\nbelligerum ceu numen habens\". Dum pronus adhaeret\ndiuitis optata praesentia turbida rostris\napparet. Conclamat inops : \"Succurrite ciues,\nciuis adest uiolentus, atrox, mea fata requirens,\nquem nihil offendi, nisi quod sum pauper honestus.\nEcce, triumphalis, metuendum, dextera, ferrum\nid quod in hostiles iugulos ex urbe tulisti,\nin Patria reuocare uelis? Ne uiscera matris\ntransadigas gladio, laceres ne membra parentis,\nquae te palmiferis docuit concurrere telis.\nParce, precor, ferrata manus : ciuilia colla\nne ferias, quae mucro tuus defendit ab hoste.\nSit pudor atque nefas extinguere proelia campo\net mortes transferre foro\". Lamenta minora\ncredimus auditu : dolor est spectare cadentem,\nfunera siue oculis uiuum uidisse cadauer\ncum gemit et moriens tremibundos palpitat artus.\nMugitus quos ille dabit per moenia pauper,\ncum uulgo spectante cadet, cum membra cruore\nperfundat moribunda, solo cum mordet harenam:\nanguibus implicitum credas Laoconta gementem!\nSic decet ut fortis lassos, ut diues egentes\nciues ciuis ames? Aut sic defenditur insons?\nSi uocem simulacra darent, tua signa rogassent\net dolor ista daret deflendis uerba querelis:\n\"Dic, iuuenis diues, patriae, dic, fortis amator,\nsi pauper reus est, tua quid peccauit imago,\nuirtutis monumenta tuae? Quid testis honorum\ntemnitur et patriae foedantur moenia nostrae?\".\nHaec simulacrorum uox est. Patriaeque gementis\naudi uerba tuae : \"Merito te laeta creaui,\ninfantem gremio tenui, simul ubera paruo\nurbs mater tremibunda dedi, cunabula praestans,\nquem praetextatum iaculis proludere iussi:\nimpubes iam fortis eras, inuictus adultus\net iuuenis uictor. Sed ne fraudatus abires\nfortunae quocunque bono, largitur honores,\ndiuitias confert, tribuit per bella triumphos.\nEt pro tot meritis instas orbare parentem\npignore percusso, cui nil fortuna bonorum\ncontulit iniusto censens moderamine fatum?","prev":{"citation":"Romulea 5.218-261","label":"Lines 5.218-5.261","url":"https://interlinea.aeterna-institute.org/library/latin/dracontius/romulea/5.218","api":"https://interlinea.aeterna-institute.org/api/v1/library/latin/dracontius/romulea/5.218"},"next":{"citation":"Romulea 5.306-329","label":"Lines 5.306-5.329","url":"https://interlinea.aeterna-institute.org/library/latin/dracontius/romulea/5.306","api":"https://interlinea.aeterna-institute.org/api/v1/library/latin/dracontius/romulea/5.306"},"credit":{"text":"Dracontius, Romulea. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/DRAC%7Cromu%7C001","quality":"proofread"}}