{"kind":"section","lang":"la","language":"Latin","title":"Romulea 5.44-86","citation":"Dracontius, Romulea 5.44-86","ref":"5.44","level":null,"urn":null,"url":"https://interlinea.aeterna-institute.org/library/latin/dracontius/romulea/5.44","api":"https://interlinea.aeterna-institute.org/api/v1/library/latin/dracontius/romulea/5.44","markdown":"https://interlinea.aeterna-institute.org/library/latin/dracontius/romulea/5.44.md","author":{"name":"Dracontius","url":"https://interlinea.aeterna-institute.org/library/latin/dracontius"},"work":{"title":"Romulea","url":"https://interlinea.aeterna-institute.org/library/latin/dracontius/romulea","urn":null},"verse":true,"words":287,"text":"Nullus ab insidiis locus est qui fraude uacabit.\nAdde quod iratus uictor cum lege minatur\net lator legis ciuilia iura repellit,\nut legem premat ipse suam, quam sanxerat ante.\nDum uictor post bella redit, cum testis imago\nformatur uirtutis, honos et gloria campi,\nlaetantur humiles, gaudebat turba reorum\net ueniam meruisse putant. Quis ciuis asylum\ncredat in arce micans insontibus esse periclum?\nPauper adest miserandus, inops, sed ciuis honestus,\nsemper egens, humilis, dignus quem diues amaret,\ncuius in obsequio famulari posset alumnus,\ntorua superborum sineret si turba clientum.\nQui dignum seruire putans indignus habetur\nuel fastiditur supplex. Inimicus et hostis\ndiuitis arguitur pauper, qui uota clientis\nausus habere miser; nec <haec> tamen ipse meretur,\nsed probus horretur. Domibus magis ille potentum\nliber amicus erit, quisquis uult esse satelles:\nquo praesente nefas committitur atque siletur,\naut scelus hoc si forte sonet, tamen ille negabit\nsponte petens tormenta, cruces, per membra, per artus\ncarnifices flammas proprio satiare cruore,\ntortoris laudare manum; pro diuite poenas\nsi patitur, si uincla gerens ergastula portet,\nse reputet cruciasse alios ut crimina celet.\n<Vt> talis diues qualis mendicus amari\npossit et infelix, ad crimina conscius esto.\nVt teneant fauces obsessas nocte latrones\naut pelagi rabidos fluctus pirata uagetur\nnec timeat ualidas sub tempestate procellas,\npraeda iubet. Petulans ut luxurietur adulter\net tractet de clade uiri, de morte mariti\n(ultima cena datur, quam praestat adultera coniux\npocula mortifero corrumpens blanda ueneno:\ncum gaudet conuiua, perit), spes crimina ducit\nad facinus, cum lucra petunt. Impune libido\ndum peccare cupit, uindex subducitur <aequi>\nquem perimit sub fraude reus. Cuicunque furori\nest operae pretium, sperant sua praemia culpae.\nConicitur \"cuicunque bono\" quod Cassius inquit.\nCrimina temptentur, fortisque in paupere diues\nquid timet aut optet, uos saltim aduertite, ciues.","prev":{"citation":"Romulea 5.1-43","label":"Lines 5.1-5.43","url":"https://interlinea.aeterna-institute.org/library/latin/dracontius/romulea/5.1","api":"https://interlinea.aeterna-institute.org/api/v1/library/latin/dracontius/romulea/5.1"},"next":{"citation":"Romulea 5.87-128","label":"Lines 5.87-5.128","url":"https://interlinea.aeterna-institute.org/library/latin/dracontius/romulea/5.87","api":"https://interlinea.aeterna-institute.org/api/v1/library/latin/dracontius/romulea/5.87"},"credit":{"text":"Dracontius, Romulea. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/DRAC%7Cromu%7C001","quality":"proofread"}}