{"kind":"section","lang":"la","language":"Latin","title":"Romulea 8.1-43","citation":"Dracontius, Romulea 8.1-43","ref":"8.1","level":null,"urn":null,"url":"https://interlinea.aeterna-institute.org/library/latin/dracontius/romulea/8.1","api":"https://interlinea.aeterna-institute.org/api/v1/library/latin/dracontius/romulea/8.1","markdown":"https://interlinea.aeterna-institute.org/library/latin/dracontius/romulea/8.1.md","author":{"name":"Dracontius","url":"https://interlinea.aeterna-institute.org/library/latin/dracontius"},"work":{"title":"Romulea","url":"https://interlinea.aeterna-institute.org/library/latin/dracontius/romulea","urn":null},"verse":true,"words":281,"text":"Troiani praedonis iter raptumque Lacaenae\net pastorale scelerati pectoris ausum\naggrediar meliore uia. Nam prodimus hostem\nhospitis et thalami populantem iura mariti,\nfoedera coniugii, consortia blanda pudoris,\nmateriem generis, sobolis spem, pignora prolis:\nnam totum de matre uenit, de matre creatur\nquod membratur homo; pater est fons auctor origo,\nsed nihil est <sine> matre pater: quota portio patris\nomnis constat homo? Mater fit tota propago.\nErgo nefas Paridis, quod raptor gessit adulter,\nut monitus narrare queam, te grandis Homere,\nmollia blandifluo delimas uerba palato;\nquisquis in Aonio descendit fonte poeta,\nte numen uult esse suum; nec dico Camenae\nte praesente \"ueni\": sat erit mihi sensus Homeri,\nqui post fata uiget, qui duxit ad arma Pelasgos\nPergama Dardanidum uindex in bella lacessens;\net qui Troianos inuasit nocte poeta,\narmatos dum clausit equo, qui moenia Troiae\nperculit et Priamum Pyrrho feriente necauit:\nnumina uestra uocans, quicquid contempsit uterque\nscribere Musagenes, hoc uilis colligo uates.\nReliquias praedae uulpes sperare leonum\nlaudis habent, meruisse cibos quos pasta recusant\nuiscera, quos rabies iam non ieiuna remisit\nexultant praedamque putant nuda ossa ferentes.\nAttica uox te, sancte, fouet, te lingua Latina\ncommendat: uulgate, precor, quae causa nocentem\nfecit Alexandrum raptu spoliaret Amyclas.\nCaelicolum praetor iam sederat arbiter Idae:\niam gremium caespes, iam surgens herbida tellus\nstabat et aetherium fuerant herbosa tribunal.\nSoluerat Iliacus caeli uadimonia pastor\net litem facit ipse suam: laudata recedit\ncontempta Iunone Venus. Tunc uirgo decore\nuicta dolet, nam tristis abit: heu nescia mens est,\nquae mala circumstent ausum dare iura Mineruae.\nIudicis Idaei pretio sententia fertur\ndamnaturque Paris; nec solus pastor habetur\nex hac lite reus: damnantur morte parentes,\ndamnantur fratres, et quisquis in urbe propinquus\naut cognatus erat, cunctos mors explicat una.","prev":{"citation":"Romulea 7.140-159","label":"Lines 7.140-7.159","url":"https://interlinea.aeterna-institute.org/library/latin/dracontius/romulea/7.140","api":"https://interlinea.aeterna-institute.org/api/v1/library/latin/dracontius/romulea/7.140"},"next":{"citation":"Romulea 8.44-88","label":"Lines 8.44-8.88","url":"https://interlinea.aeterna-institute.org/library/latin/dracontius/romulea/8.44","api":"https://interlinea.aeterna-institute.org/api/v1/library/latin/dracontius/romulea/8.44"},"credit":{"text":"Dracontius, Romulea. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/DRAC%7Cromu%7C001","quality":"proofread"}}