{"kind":"section","lang":"la","language":"Latin","title":"Romulea 8.183-229","citation":"Dracontius, Romulea 8.183-229","ref":"8.183","level":null,"urn":null,"url":"https://interlinea.aeterna-institute.org/library/latin/dracontius/romulea/8.183","api":"https://interlinea.aeterna-institute.org/api/v1/library/latin/dracontius/romulea/8.183","markdown":"https://interlinea.aeterna-institute.org/library/latin/dracontius/romulea/8.183.md","author":{"name":"Dracontius","url":"https://interlinea.aeterna-institute.org/library/latin/dracontius"},"work":{"title":"Romulea","url":"https://interlinea.aeterna-institute.org/library/latin/dracontius/romulea","urn":null},"verse":true,"words":308,"text":"Dum canit infelix gemitus Cassandra futuros,\nuisus adest cunctis Phrygibus Thymbraeus Apollo,\nqui mercede carens conclusit Pergama muro\net genus ingratum poenas persoluat auari\nexoptat: stupuere Phryges, tacet ipse sacerdos.\nEffatur: \"Quid uirgo canit? Cur inuidus alter\nexclamat? Helenus deterret Pergama uerbis?\nPellere pastorem patriis de sedibus unquam\nfata uetant, quae magna parant. Stant iussa deorum:\nmagnanimum Aeacidem solus prosternet Achillem.\nTroianos regnare placet, qua solis habenae\nostendunt tolluntque diem, qua uertitur axis\nfrigidus et zona flammatur sole corusco.\nTroianis dabitur totus possessio mundus,\ntempore nec paruo Troum regnabit origo.\nFata manent, conscripta semel sunt uerba Tonantis,\n'imperium sine fine' dabit. Cohibete furorem.\nMortali diuum periet quo iudice iudex?\nNec hoc fata sinunt. Pudor est uoluisse nocere\net non posse tamen. Pigeat, iam nemo minetur\nquem Clotho, quem Lachesis, quem uindicat Atropos ingens.\nScindite pellitas niueo de pectore uestes,\nmurice Serrano rutilans hunc purpura uelet.\nNec pudeat, quod pauit oues: ego pastor Apollo\nipse fui domibusque canens pecus omne coegi,\ncum procul a uilla fumantia tecta uiderem;\nAlcestam sub nocte pauens deus ubera pressi,\nAdmetus intrantes haedos numerabat et agnos\".\nDixerat, et Phoebum Priamus summissus adorat\net grates securus agit, tacet optimus Hector.\nIam regno non impar erat, sed sceptra tiaram\nimperium trabeas iam post caeleste tribunal\ntotum uile putat, solam cupit addere famam\nmaiorum titulis, uiuaces quaerere laudes,\nut celet quod pastor erat. Vix uiderat aulam\nregis, et Iliacas quaerit per litora puppes;\nAegaeum sulcare fretum iam mente parabat.\nSic pater alloquitur iuuenem sermone uerendo:\n\"Nate, redux pietatis amor, bonus arbiter Idae,\ndic, ubi uis armare rates, ubi carbasa tendis?\nNusquam bella paro, regnum sub pace guberno.\nSed si torpor iners pudor est et turpe uacare\ncredis, Alexander, certe legatus adesto\net Telamona ducem conuentum exposce sororem\nHesionem mox, nate, meam: captiua tenetur\nme regnante soror. Dum Dorica regna peragras,\ndat Venus uxorem, faciet te Iuno maritum\".","prev":{"citation":"Romulea 8.131-182","label":"Lines 8.131-8.182","url":"https://interlinea.aeterna-institute.org/library/latin/dracontius/romulea/8.131","api":"https://interlinea.aeterna-institute.org/api/v1/library/latin/dracontius/romulea/8.131"},"next":{"citation":"Romulea 8.230-273","label":"Lines 8.230-8.273","url":"https://interlinea.aeterna-institute.org/library/latin/dracontius/romulea/8.230","api":"https://interlinea.aeterna-institute.org/api/v1/library/latin/dracontius/romulea/8.230"},"credit":{"text":"Dracontius, Romulea. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/DRAC%7Cromu%7C001","quality":"proofread"}}