{"kind":"section","lang":"la","language":"Latin","title":"Romulea 8.274-315","citation":"Dracontius, Romulea 8.274-315","ref":"8.274","level":null,"urn":null,"url":"https://interlinea.aeterna-institute.org/library/latin/dracontius/romulea/8.274","api":"https://interlinea.aeterna-institute.org/api/v1/library/latin/dracontius/romulea/8.274","markdown":"https://interlinea.aeterna-institute.org/library/latin/dracontius/romulea/8.274.md","author":{"name":"Dracontius","url":"https://interlinea.aeterna-institute.org/library/latin/dracontius"},"work":{"title":"Romulea","url":"https://interlinea.aeterna-institute.org/library/latin/dracontius/romulea","urn":null},"verse":true,"words":278,"text":"Turpe ducis seruire genus crimenque putatur,\nsi non bella dabunt regi quod bella tulerunt.\nSi pax hoc optata negat, pro rege rogaris:\nte repetisse puta Priamo retinente sororem;\nnon dolor armaret, si non daret ille rogatus?\nQuod peteris, Telamon, scelus est et fama pudoris;\nnascitur inuidia, Priamo regnante sororem\nGraiugenis seruire suam, liuor malus inde\ncreditur: 'Iliacas potuit reparare ruinas',\nmurmur erit Phrygibus, 'consortem sanguinis unam\nnon ualuit' dicent 'rector de rege mereri'.\nDixerat. At Telamon mentes armabat in iras;\nnam pietas affectus amor concordia proles\naccendunt motus in pectore fellis amari.\nConubium regni, thalami consortia casti\nscindere poscebant, et, quod mens nulla tulisset,\nAiacis haec mater erat. Sic incipit ore\nturbidus Aeacides iusta succensus in ira:\n\"Si pudor Iliacis aut mentibus esset honestas,\nexcidium Troiae si pectora uicta dolerent,\nHerculeos comites Priami gens, praeda Pelasgum,\nnon magis auderent in bella lacessere Graios\nsemideum post bella ducum, quibus Ilios ingens\nuicta iacet. Placuitne Phrygis periuria gentis\nsoluere uos iterum? Sic dudum parua luistis\nsupplicia? Priamo, Troes, mea dicta referte:\nuictori quis uictus ait: 'Te bella gerente\nme maneat uirtutis honos, me praeda sequatur,\npraemia me laudis, me praemia cuncta triumphi\nexpectent, sterili uictor sed laude potitus\net ieiunus eat'? Quis regi quisue marito\nuel misero sic ausus ait cum uoce proterua:\n'Conubium rescinde tuum, rumpatur honesto\nfoedere iuncta domus, thalami damnentur amantum,\nfestiuas extingue faces'? Quis uicit, ut istud\naudiat Aeacides, patriam qui perculit hosti?\nQuando tamen uictor uicti sub lege tenetur?\nSi Priami recidiua domus manet illa tyranni\npost ignes reparata meos, si pendit amorem\ngermanae rex ipse suae, pro dote sorori\nuel regni pars iusta detur, ne uindicet Aiax\nquod matri donasset auus, si Troia maneret.","prev":{"citation":"Romulea 8.230-273","label":"Lines 8.230-8.273","url":"https://interlinea.aeterna-institute.org/library/latin/dracontius/romulea/8.230","api":"https://interlinea.aeterna-institute.org/api/v1/library/latin/dracontius/romulea/8.230"},"next":{"citation":"Romulea 8.316-359","label":"Lines 8.316-8.359","url":"https://interlinea.aeterna-institute.org/library/latin/dracontius/romulea/8.316","api":"https://interlinea.aeterna-institute.org/api/v1/library/latin/dracontius/romulea/8.316"},"credit":{"text":"Dracontius, Romulea. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/DRAC%7Cromu%7C001","quality":"proofread"}}