{"kind":"section","lang":"la","language":"Latin","title":"Romulea 8.89-130","citation":"Dracontius, Romulea 8.89-130","ref":"8.89","level":null,"urn":null,"url":"https://interlinea.aeterna-institute.org/library/latin/dracontius/romulea/8.89","api":"https://interlinea.aeterna-institute.org/api/v1/library/latin/dracontius/romulea/8.89","markdown":"https://interlinea.aeterna-institute.org/library/latin/dracontius/romulea/8.89.md","author":{"name":"Dracontius","url":"https://interlinea.aeterna-institute.org/library/latin/dracontius"},"work":{"title":"Romulea","url":"https://interlinea.aeterna-institute.org/library/latin/dracontius/romulea","urn":null},"verse":true,"words":282,"text":"Dum pergunt et templa petunt, prorumpit in agmen\npastor et attonitos elata uoce salutat:\n\"Sis felix, princeps, omnes saluete sodales\naut fratres, ut uera feram: tu fortior Hector,\nculmen et urbis apex, et uiribus indolis alme\nTroile: frater ego, fratrem cognoscite uestrum.\nGermanus sum uester ego Priamique propago,\nHecuba mi genitrix, abdicor crimine nullo:\nparuus Alexander pastor nutritur in Ida.\nNec pastor sit uile, Phryges: ego iurgia diuum\ncompressi, nam lite caret me iudice caelum.\nSi credis, germana manus (nec cetera regis\nconscia corda negant nec mater pignus abhorret),\nnoscite depositi uel certa crepundia, fratres\".\nDixerat et testes generis proiecit in arce.\nVerba fides pietas quatiunt mox corda parentum,\nammissumque nefas generosa mente fatetur\nfusus in ora rubor. Paridis mox colla lacertis\nalligat et natum fletu gaudentis inundat\nconuictusque pater ueniam de prole negabat.\nObstupuere omnes. Mater gauisa recurrit\n(dat celeres pietas gressus quos denegat aetas),\nmox iuuenem complexa tenet: per colla per ora\noscula diffundunt et lambere membra parentes\ninsistunt iuuenis certatim, sed pius ardor\naffectus dispensat, agens alternat utrique\net uicibus cara Paridis ceruice fruuntur.\nNuntius interea totam compleuerat urbem:\nfama uolat per templa deum, quod pastor ab Ida\nse uelit ostendi regni de stirpe creatum.\nTunc Helenus uates templum dimisit et aram\net procul exclamat: \"Pater impie, pessima mater,\nquid pietas crudelis agit, quid perditis urbem?\nHaec est illa tuo fax, mater, prodita somno,\nquae simul incendet Troiam regnumque parentum\nin sortem dabit illa nurus. Coniurat in arma\nGraecia tota dolens raptum punire Lacaenae,\nlitora nostra petent Danai cum mille carinis,\nDorica castra fremunt, iam Pergama uexat Achilles,\niam pugnant Danai, iam cernimus Hectora tractum,\nTroile, iam per bella furis, iam sterneris audax\nante annos, animose puer, uirtute proteruus.","prev":{"citation":"Romulea 8.44-88","label":"Lines 8.44-8.88","url":"https://interlinea.aeterna-institute.org/library/latin/dracontius/romulea/8.44","api":"https://interlinea.aeterna-institute.org/api/v1/library/latin/dracontius/romulea/8.44"},"next":{"citation":"Romulea 8.131-182","label":"Lines 8.131-8.182","url":"https://interlinea.aeterna-institute.org/library/latin/dracontius/romulea/8.131","api":"https://interlinea.aeterna-institute.org/api/v1/library/latin/dracontius/romulea/8.131"},"credit":{"text":"Dracontius, Romulea. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/DRAC%7Cromu%7C001","quality":"proofread"}}