{"kind":"section","lang":"la","language":"Latin","title":"Romulea 9.1-44","citation":"Dracontius, Romulea 9.1-44","ref":"9.1","level":null,"urn":null,"url":"https://interlinea.aeterna-institute.org/library/latin/dracontius/romulea/9.1","api":"https://interlinea.aeterna-institute.org/api/v1/library/latin/dracontius/romulea/9.1","markdown":"https://interlinea.aeterna-institute.org/library/latin/dracontius/romulea/9.1.md","author":{"name":"Dracontius","url":"https://interlinea.aeterna-institute.org/library/latin/dracontius"},"work":{"title":"Romulea","url":"https://interlinea.aeterna-institute.org/library/latin/dracontius/romulea","urn":null},"verse":true,"words":296,"text":"Si decus est uirtus et praemia cuncta meretur,\nsi meritum post prima manet, si fama superstes\neminet et gaudet titulis ornare sepulchra,\nannue quod petimus. Fortis pro forte rogaris:\negregias mentes uirtus delectat in hoste,\ninuidia mens summa caret, laudare decora\nnouit et ingentes attollere gestiet actus.\nDat uirtus exempla bonis prauisque pudorem,\ndebilitas quos lassa premit. Tu, fortis Achilles,\nquid prohibes tumulos, quamuis iactura sepulchri\ntemnitur et nihil est quoduis in morte periclum?\nSi sensus post fata perit, cur busta negantur?\nSi mens ulla manet , iam rectius ergo putatur\nnon requies, sed poena rogus: tormenta sepulchrum\ningerit et manes tolerant per membra dolorem.\nSed sensum cum luce simul post fata perire,\nsegnibus et pueris mentitur fama relatrix.\nSunt animae post membra piae, quas ignea uirtus\ntollit ad astra micans et solis in orbe recondit\nlunares non passa globos; ac desuper orbem\nexpectant stellasque uagas et signa leonis\nAugusto quid mense parent, quid cetera temptent\nornamenta poli. Rident sua membra uidentes\nfuneris abiecti fragiles et corporis usus,\nut doleant animae iam libertate recepta\ncorporibus uixisse suis et claustra tulisse\ncarceris angusti. Tumulos aut ossibus urnas\ndedignant animae, non curant uile sepulchrum\nnec plangunt non esse simul, quas urna polorum\nclaudit et aetherium Phoebus suspendit ad axem.\nAduenturus eris, pietas si sancta manebit\ncorpore belligero, si non crudelis in hoste\npost uitam morientis eris, si immitis Achilles\nnec post bella manes nec spectant funera poenas\narbitrio subiecta tuo, si parcitur umbris,\nquaesitor quas torquet auus, si uera feruntur.\nNon Hector, sed Troia rogat miserique parentes,\nAndromache uiduata gemit uel ad ubera paruum\nAstyanacta tenet, sic caelum questibus implet;\nuirgo Polyxene lacrimis ornata decoris\net planctu laniata genas, contusa lacertos\nac longis dispersa comis onerata pudore\ningemit et tantum nutu sine uoce precatur,\nfuneris Hectorei poscens exangue cadauer.","prev":{"citation":"Romulea 8.638-655","label":"Lines 8.638-8.655","url":"https://interlinea.aeterna-institute.org/library/latin/dracontius/romulea/8.638","api":"https://interlinea.aeterna-institute.org/api/v1/library/latin/dracontius/romulea/8.638"},"next":{"citation":"Romulea 9.45-96","label":"Lines 9.45-9.96","url":"https://interlinea.aeterna-institute.org/library/latin/dracontius/romulea/9.45","api":"https://interlinea.aeterna-institute.org/api/v1/library/latin/dracontius/romulea/9.45"},"credit":{"text":"Dracontius, Romulea. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/DRAC%7Cromu%7C001","quality":"proofread"}}