{"kind":"section","lang":"la","language":"Latin","title":"Romulea 9.97-138","citation":"Dracontius, Romulea 9.97-138","ref":"9.97","level":null,"urn":null,"url":"https://interlinea.aeterna-institute.org/library/latin/dracontius/romulea/9.97","api":"https://interlinea.aeterna-institute.org/api/v1/library/latin/dracontius/romulea/9.97","markdown":"https://interlinea.aeterna-institute.org/library/latin/dracontius/romulea/9.97.md","author":{"name":"Dracontius","url":"https://interlinea.aeterna-institute.org/library/latin/dracontius"},"work":{"title":"Romulea","url":"https://interlinea.aeterna-institute.org/library/latin/dracontius/romulea","urn":null},"verse":true,"words":277,"text":"non purus sub sole dies, non sidera noctis\nimpolluta micant, fuscantur cornua lunae,\nsordibus et totum caeli nox inficit orbem.\nNon Phoebus Danais morbos, non Troia Pelasgis\ninferet aut natam repetens per castra sacerdos\nChryses Apollineus: hinc sunt, hinc funera maesta\nfortibus et bellum geritur cum Morte cruenta.\nHector in hoste fuit saeuus, cum uita maneret:\nplus post fata nocet. Certe medicabilis ille\nte Chiron docuit pestes sanare iacentum,\ncum chordas quateret plectro, cum bella manerent,\net citharam post lora daret, cum mentis onustae\npost Centaurorum raptas de flumine praedas\ningentes animos puerili in corde leuaret;\nnon docuit, quia maestus odor, quia putre cadauer\naera tellurem uentos animasque grauabit?\nInde homines uolucres pecudes et cuncta necantur,\ncorpora uiuorum pariter mundique salutem\nmors neglecta nocet: non sunt commercia iuncta\nmortibus et superis, diuisit limite mundos\nimposito natura parens; non congruit aether\nfuneribus nec funus amat sub sole iacere,\ninferni secreta dei sub nocte petuntur.\nNon tibi per somnos aderit censoris imago,\nAeacus in medias ueniens ad castra tenebras\nuoce manuque furens et te culpabit amare\nasper et increpitans? Et iusta uoce notabit:\n\"Tene, deum suboles, caeli pelagique nepotem,\natque Erebi gens clara mei, te, fortis Achilles,\nista decent? Tumuli caesis et busta negentur?\nNec dabis occisos iuuenes Acheronta natare,\nprostratis dum busta negas mortesque sepulchris\nabdicas? Me uita pia promouit ad urnam,\nhumani generis laudes et crimina quaeram;\nnec tamen hinc securus eris, quia noster ad urnam\naduenies quandoque nepos: ignoscere manes\nignorant mecumque Minos uel Gnossius illic\niudicium Rhadamanthus habet commune barathri.\nNominis inuidiam uestri per flumina manes\nexagitant, sua iura neges quod morte peremptis,\nPatroclumque tenent, quem nec conscendere cymbam\npermittunt, nisi primus aquas transcenderit Hector.","prev":{"citation":"Romulea 9.45-96","label":"Lines 9.45-9.96","url":"https://interlinea.aeterna-institute.org/library/latin/dracontius/romulea/9.45","api":"https://interlinea.aeterna-institute.org/api/v1/library/latin/dracontius/romulea/9.45"},"next":{"citation":"Romulea 9.139-179","label":"Lines 9.139-9.179","url":"https://interlinea.aeterna-institute.org/library/latin/dracontius/romulea/9.139","api":"https://interlinea.aeterna-institute.org/api/v1/library/latin/dracontius/romulea/9.139"},"credit":{"text":"Dracontius, Romulea. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/DRAC%7Cromu%7C001","quality":"proofread"}}