{"kind":"section","lang":"la","language":"Latin","title":"Satisfactio 1-44","citation":"Dracontius, Satisfactio 1-44","ref":"1","level":null,"urn":null,"url":"https://interlinea.aeterna-institute.org/library/latin/dracontius/satisfactio/1","api":"https://interlinea.aeterna-institute.org/api/v1/library/latin/dracontius/satisfactio/1","markdown":"https://interlinea.aeterna-institute.org/library/latin/dracontius/satisfactio/1.md","author":{"name":"Dracontius","url":"https://interlinea.aeterna-institute.org/library/latin/dracontius"},"work":{"title":"Satisfactio","url":"https://interlinea.aeterna-institute.org/library/latin/dracontius/satisfactio","urn":null},"verse":true,"words":275,"text":"Rex immense Deus, cunctorum conditor et spes,\nQuem tremit omne solum, qui regis igne polum,\nSidera flamma dies quem sol nox luna fatentur\nAuctorem, Dominum saecula cuncta probant:\nPrincipio seu fine carens et temporis expers\nNescius alterni nec uice functus agis,\nOmnia permutans nullo mutabilis aeuo\nIdem semper eris qui es modo uel fueras;\nNil addit demitque tibi tam longa uetustas:\nOmnia tempus habent, nam tibi tempus abest;\nQui mentes hominum qua uis per singula ducis\nEt quocumque iubes dirigis ingenia,\nQui facis iratus homines contraria uelle\nPropitiusque iubes ut bona cuncta gerant.\nQuicquid agunt homines, bona tristia prospera praua,\nHoc fieri ammittunt ira fauorque Dei.\nHoc tua uerba probant Moseo dicta prophetae,\nQuod duraturus cor Pharaonis eras.\nSic mea corda Deus, nostro peccante reatu\nTemporis immodici, pellit ad illicita,\nVt qui facta ducum possem narrare meorum,\nNominis Asdingui bella triumphigera,\nVnde mihi merces posset cum laude salutis\nMunere regnantis magna uenire simul,\nPraemia despicerem tacitis tot regibus almis,\nVt peterem subito certa pericla miser.\nQuis nisi caelesti demens compulsus aB ira\nAspera cuncta petat, prospera cuncta negat?\nIrascente Deo mentes mutantur et artus,\nVertuntur sensus, uertitur et species.\nPersarum regem Babylonae regna tenentem\nPost decus imperii quis neget esse bouem?\nEt diademalem turparunt cornua frontem,\nMugitus pecudis uerba fuere duci.\nAgricolam timuit post Parthica regna bubulcum\nSummisitque pauens regia colla iugo;\nErrauit per prata uagus mala gramina pastus\nEt qui homo bos fuerat de boue factus homo est.\nLinquit et antistes serus pater ille Iohannis\nElinguisque fuit uoce tacente silens.\nAst ego peccando regi dominoque Deoque\nPeior sum factus deteriorque cane.\nVulnera uexati curat sua lingua molossi,\nHeu mea quippe mihi uulnera lingua dedit.","prev":null,"next":{"citation":"Satisfactio 45-90","label":"Lines 45-90","url":"https://interlinea.aeterna-institute.org/library/latin/dracontius/satisfactio/45","api":"https://interlinea.aeterna-institute.org/api/v1/library/latin/dracontius/satisfactio/45"},"credit":{"text":"Dracontius, Satisfactio. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/DRAC%7Csati%7C001","quality":"proofread"}}