{"kind":"section","lang":"la","language":"Latin","title":"Satisfactio 179-222","citation":"Dracontius, Satisfactio 179-222","ref":"179","level":null,"urn":null,"url":"https://interlinea.aeterna-institute.org/library/latin/dracontius/satisfactio/179","api":"https://interlinea.aeterna-institute.org/api/v1/library/latin/dracontius/satisfactio/179","markdown":"https://interlinea.aeterna-institute.org/library/latin/dracontius/satisfactio/179.md","author":{"name":"Dracontius","url":"https://interlinea.aeterna-institute.org/library/latin/dracontius"},"work":{"title":"Satisfactio","url":"https://interlinea.aeterna-institute.org/library/latin/dracontius/satisfactio","urn":null},"verse":true,"words":284,"text":"Cuius ab imperio surgens et origine Caesar\nAugustus meruit tempus habere pium.\nTempore namque eodem est natus de uirgine Christus,\nCuius et emicuit stella per astra poli.\nDux princeps Romanus erat de principe Titus(==TI+TUS),\nSi non praestaret, dicere saepe solens:\n\"Perdidimus hac luce diem\", si nulla dedisset\nNon exoratus praestita supplicibus.\nAlter ait princeps modico sermone poeta\nCommodus Augustus, uir pietate bonus:\n\"Nobile praeceptum, rectores, discite post me:\nSit bonus in uita qui uolet esse deus\".\nEcce quid impendit homini clementia simplex,\nVt praestet bona dans conferat atque animae.\nNe facias populum mendacem, qui tibi clamat\nVocibus innumeris \"rex dominusque pius\";\nVt uox uera sonet \"dominus\", sic uera \"pius\" sit.\nOrbis in ore uolat puplica merx procerum.\nFama ducum mos est bellis collecta cruentis,\nEx quibus occurrit saepe reatus atrox.\nGloria bellorum ducibus populisque triumphos\nIn commune datos diuidit armipotens.\nNam ducibus solis praestat clementia laudem,\nNon habet haec comitem participemque negat.\nDicit \"in arma pares fuimus cum principe\" miles,\n\"Me pugnante, comes, uictor ab hoste redis\".\nNumquid, ut ignoscat rector, pars militis intrat?\nSoli qui ignoscit gloria laudis erit.\nQui fodit aduersos hostes certamina Martis\nHorrida concurrens, uincit in arma fremens;\nRex, qui dat ueniam subiecto et temperat iras,\nPlus quam turba facit, qui sua corda domat.\nTe Deus aspiciens effundere nolle cruorem,\nVt sine peccato, non sine laude daret,\nContulit absenti terrae pelagique triumphos:\nAnsila testatur, Maurus ubique iacet.\nQuod pereunt hostes, regis fortuna uocatur,\nQuod pereunt populi, temporis ordo regit.\nNam si debilitas faceret discurrere mortes,\nNon caderent pueri aut femina sexus iners.\nOmnia tempus agit, cum tempore cuncta trahuntur,\nTempora eunt uitae, tempora mortis eunt:\nSex sunt aetates hominum procul usque senectam,\nHae distincta tenent tempora quaeque sua.","prev":{"citation":"Satisfactio 135-178","label":"Lines 135-178","url":"https://interlinea.aeterna-institute.org/library/latin/dracontius/satisfactio/135","api":"https://interlinea.aeterna-institute.org/api/v1/library/latin/dracontius/satisfactio/135"},"next":{"citation":"Satisfactio 223-268","label":"Lines 223-268","url":"https://interlinea.aeterna-institute.org/library/latin/dracontius/satisfactio/223","api":"https://interlinea.aeterna-institute.org/api/v1/library/latin/dracontius/satisfactio/223"},"credit":{"text":"Dracontius, Satisfactio. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/DRAC%7Csati%7C001","quality":"proofread"}}