{"kind":"section","lang":"la","language":"Latin","title":"Satisfactio 223-268","citation":"Dracontius, Satisfactio 223-268","ref":"223","level":null,"urn":null,"url":"https://interlinea.aeterna-institute.org/library/latin/dracontius/satisfactio/223","api":"https://interlinea.aeterna-institute.org/api/v1/library/latin/dracontius/satisfactio/223","markdown":"https://interlinea.aeterna-institute.org/library/latin/dracontius/satisfactio/223.md","author":{"name":"Dracontius","url":"https://interlinea.aeterna-institute.org/library/latin/dracontius"},"work":{"title":"Satisfactio","url":"https://interlinea.aeterna-institute.org/library/latin/dracontius/satisfactio","urn":null},"verse":true,"words":288,"text":"Numquid adultorum strepitus infantia simplex\nVindicat aut fremitus pigra senectus habet?\nNon catulaster agit puerilia, non puer audet\nAttrectare tener Martia tela manu.\nNon furit in uenerem nondum pubentibus annis\nNec sub flore genae marcidus est iuuenis;\nMaturus tractat, gemit et tremebunda senectus\nNescia feruoris uel leuitatis inops.\nNumquid mox natas segetes uiror armat aristis,\nFloribus aut genitis fructus inest subito?\nNouimus astra poli confectos perdere cursus\nTransactasque simul sic repetisse uias.\nTempore luna suo crescit uel deficit orbe,\nCuius ad aetatem plurima lege notant.\nNam luna crescente fretum crementa resumit,\nQua minuente polis est minor unda maris.\nCynthia dum crescit, fontes et flumina crescunt,\nHaec eadem minuunt, Cynthia dum minuit.\nIpsa medulla latens obseruat cornua lunae,\nObseruant lunae tecta cerebra globos.\nSol oculus caeli radians fuscatur ab umbra\nEt tamen ad solitas itque reditque plagas,\nAc recipit facies priscas lucesque resumit.\nDamna uel augmentum dant quae elementa ferunt.\nAlternant elementa uices et tempora mutant,\nTempus habent noctes, tempus et ipse dies;\nAccipiunt augmenta dies noctesque uicissim\nAc minuunt cursus perpete lege poli.\nTempora sunt florum, retinet sua tempora messis,\nTempus et autumnum, tempus habet hiemes.\nVer aestas autumnus hiems (redit annus in annum)\nQuattuor alternant tempora temporibus.\nOmnia cum redeant, homini sua non redit aetas,\nSed uelut acris auis sic fugitiua uolat.\nTempora sunt pacis uel tempora certa cruoris,\nOtia tempus habent militiaeque labor.\nTempora gaudendi, sunt tempora certa dolendi,\nTempora dant lucrum, tempora damna ferunt.\nNubila tempus habent et tempora certa serenum.\nTempora seruare iussit et ipse Deus.\nHoram quaesiuit faciens miracula Christus;\nHoram sperauit passio sancta crucis.\nVt mi irascaris, quis sim <qui> dignior ira\nTam magni regis iudicer esse tua?\nQuando per aetherias aquila uolitante rapinas\nPraeda cibusque fuit passer hirundo picus(==PI-CUS)?","prev":{"citation":"Satisfactio 179-222","label":"Lines 179-222","url":"https://interlinea.aeterna-institute.org/library/latin/dracontius/satisfactio/179","api":"https://interlinea.aeterna-institute.org/api/v1/library/latin/dracontius/satisfactio/179"},"next":{"citation":"Satisfactio 269-316","label":"Lines 269-316","url":"https://interlinea.aeterna-institute.org/library/latin/dracontius/satisfactio/269","api":"https://interlinea.aeterna-institute.org/api/v1/library/latin/dracontius/satisfactio/269"},"credit":{"text":"Dracontius, Satisfactio. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/DRAC%7Csati%7C001","quality":"proofread"}}