{"kind":"section","lang":"la","language":"Latin","title":"Satisfactio 269-316","citation":"Dracontius, Satisfactio 269-316","ref":"269","level":null,"urn":null,"url":"https://interlinea.aeterna-institute.org/library/latin/dracontius/satisfactio/269","api":"https://interlinea.aeterna-institute.org/api/v1/library/latin/dracontius/satisfactio/269","markdown":"https://interlinea.aeterna-institute.org/library/latin/dracontius/satisfactio/269.md","author":{"name":"Dracontius","url":"https://interlinea.aeterna-institute.org/library/latin/dracontius"},"work":{"title":"Satisfactio","url":"https://interlinea.aeterna-institute.org/library/latin/dracontius/satisfactio","urn":null},"verse":true,"words":295,"text":"Quando fames rabidi quamuis ieiuna leonis\nVt sit adoptauit faucibus esca lepus?\nDeuorat egregios ingenti corpore tauros\nEt rapiunt aquilae candida membra pedes.\nDat semel iratus ueniam post uulnera pardus\nNec reduces morsus dat feritate pia.\nDespicit irasci pastoribus optima tigris,\nDespicit et talpas flammeus ore draco.\nFulmina non feriunt reptantia gramina terris\nNec modicas salices flamma trisulca cremat,\nSed feriunt celsas pulsantes nubila cedros\nEt montes uastos proxima saxa polo.\nSontes peccantes tantum sua culpa fatigat;\nEcce etiam insontes noxia poena petit.\nSi ipse ego peccaui, quaenam est, rogo, culpa meorum,\nQuos simul exagitat frigus inopsque fames?\nDiluuio periere rei sine clade piorum;\nLoth bonus et iustus tollitur ex Sodomis.\nSi non humani generis peccata fuissent,\nVnde pium nomen posset habere Deus?\nSed quia dat ueniam populis peccata relaxans,\nPer pietatis opus nomen habet placidum.\nSi ueniam frater fratri donare iubetur,\nQuid rex subiectis et dominus famulis?\nSi iustis solem Dominus pluuiasque dedisset\nNec daret iniustis, quae fuerat pietas?\nNon quaerit ueniam qui nil peccasse probatur;\nNonne manus medici languida membra petunt?\nMateriem laudis praebet tibi culpa reorum\nEt titulos famae dat pietatis opus.\nInclitus armipotens, uestrae pietatis origo,\nEt doctus, genio pronior ad ueniam,\n\"Non homini ignosco\", dixit, \"sed lingua meretur\";\nHic reus et doctus Vincomalos fuerat.\nNon laedunt delicta Deum, sed laeditur auctor,\nNi peccata dolens paeniteat sceleris.\nQui poscit hac lege Deum ut peccata relaxet,\nDebet et ipse suo parcere ubique reo.\nNon semel ignosci dixit lex sancta reatum,\nSed quotiens culpa est, sit totiens uenia.\nDicam regnanti domino pia uerba prophetae:\n\"Etsi peccaui, sum tamen ipse tuus\".\nDa ueniam, miserere, precor, succurre roganti,\nPristina sufficiant uerbera uincla fames.\nSessorem, dum carpit iter, si cornea palpans\nVngula concutiat quadrupedantis equi,\nVerbere corrigitur culpa plectente flagello,\nNon simul abscisi crura pedesque iacent.","prev":{"citation":"Satisfactio 223-268","label":"Lines 223-268","url":"https://interlinea.aeterna-institute.org/library/latin/dracontius/satisfactio/223","api":"https://interlinea.aeterna-institute.org/api/v1/library/latin/dracontius/satisfactio/223"},"next":null,"credit":{"text":"Dracontius, Satisfactio. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/DRAC%7Csati%7C001","quality":"proofread"}}