{"kind":"section","lang":"la","language":"Latin","title":"Satisfactio 45-90","citation":"Dracontius, Satisfactio 45-90","ref":"45","level":null,"urn":null,"url":"https://interlinea.aeterna-institute.org/library/latin/dracontius/satisfactio/45","api":"https://interlinea.aeterna-institute.org/api/v1/library/latin/dracontius/satisfactio/45","markdown":"https://interlinea.aeterna-institute.org/library/latin/dracontius/satisfactio/45.md","author":{"name":"Dracontius","url":"https://interlinea.aeterna-institute.org/library/latin/dracontius"},"work":{"title":"Satisfactio","url":"https://interlinea.aeterna-institute.org/library/latin/dracontius/satisfactio","urn":null},"verse":true,"words":288,"text":"Sed qui restituit pecudis post membra tyrannum\nVt fieret rediens ungula fissa manus,\nQuique reformauit tacitae modulamina linguae\nNe mutilante sono uerba ligata daret,\nIpse meo domino Deus imperat atque iubebit\nVt me restituat respiciatque pius,\nSeruet, aui ut laudes dicam patriasque suasque\nPerque suas proles regia uota canam.\nCulpa quidem grauis est, uenia sed digna reatus,\nQuod sine peccati crimine nemo fuit.\nNam Deus omnipotens potuit, cum conderet orbem,\nTristibus amotis gaudia sola dare,\nSed diuersa creans et discordantia iunxit\nEt bona mixta malis et mala mixta bonis.\nSic elementa potens contraria miscuit auctor,\nVmida cum siccis, ignea cum gelidis.\nLittera doctiloquax apibus cognata refertur,\nQuis datur ut habeant uulnera castra fauos.\nCera dat ingenium pueris, primordia sensus,\nInde fit ut praestet littera uel noceat.\nAspis habet mortes, habet et medicamina serpens,\nVipera saepe iuuat, uipera saepe nocet.\nCerua salutares pasto serpente medullas\nConficit et pellunt ipsa uenena neces.\nMateries ferri simplex et noxia fertur,\nImpius inde nocet, rusticus inde placet.\nIpsa parit gemmas pretiosos terra lapillos,\nIpsa dat et uepres spinea ligna rosas.\nDelicias mortesque parat mare fluctibus altum\nEt generat pelagi concula diuitias.\nAera temperies auris uitalibus aptat,\nQuae corrupta dies eripit atque animas.\nAspera uel facilis retinet natura uolucres:\nBlanda columba auis est, aspera uultur auis.\nNubibus aggestis pluuiae nix grando pruinae\nGignuntur, uicibus igne uapore gelu.\nSol dat temperies, species gratissima mundi,\nCuncta creanda parans, cuncta creata fouens;\nPer quem fetat humus flores et messis aristas,\nSole perustus ager putris harena iacet.\nCorpora sol reficit radiis et corpora uexat,\nSolibus alternis itque reditque salus.\nOmnia nec mala sunt nec sunt bona sidera caeli;\nLucifer hoc docuit, Sirius hoc monuit.\nTemperies caeli medium nec possidet orbem,\nNam de quinque plagis uix habet ipsa duas.","prev":{"citation":"Satisfactio 1-44","label":"Lines 1-44","url":"https://interlinea.aeterna-institute.org/library/latin/dracontius/satisfactio/1","api":"https://interlinea.aeterna-institute.org/api/v1/library/latin/dracontius/satisfactio/1"},"next":{"citation":"Satisfactio 91-134","label":"Lines 91-134","url":"https://interlinea.aeterna-institute.org/library/latin/dracontius/satisfactio/91","api":"https://interlinea.aeterna-institute.org/api/v1/library/latin/dracontius/satisfactio/91"},"credit":{"text":"Dracontius, Satisfactio. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/DRAC%7Csati%7C001","quality":"proofread"}}