{"kind":"section","lang":"la","language":"Latin","title":"Sententiae 1.78-106","citation":"Evagrius Monachus, Sententiae 1.78-106","ref":"1.78","level":null,"urn":null,"url":"https://interlinea.aeterna-institute.org/library/latin/evagrius-monachus/sententiae/1.78","api":"https://interlinea.aeterna-institute.org/api/v1/library/latin/evagrius-monachus/sententiae/1.78","markdown":"https://interlinea.aeterna-institute.org/library/latin/evagrius-monachus/sententiae/1.78.md","author":{"name":"Evagrius Monachus","url":"https://interlinea.aeterna-institute.org/library/latin/evagrius-monachus"},"work":{"title":"Sententiae","url":"https://interlinea.aeterna-institute.org/library/latin/evagrius-monachus/sententiae","urn":null},"verse":false,"words":275,"text":"Tunc enim de aere conturbabunt le inimici, noctes autem terribiles suscipient te. Conversationem monachi custodit scientia: qui autem ab ea discedit, incidit in latrones. De petra spiritali manat fluvius; anima autem bene agens bibit ex eo. Vas electionis anima munda: immunda autem replebitur amaritudine. Absque lacte non enutrietur infans: et sine impassibilitate non exaltabitur cor. Charitatem antecedit impassibilitas: scientiam autem praecedit dilectio. Scientiae adjicietur sapientia: impassibilitatem vero generat prudentia. Timor Domini generat sapientiam: fides aulem Christi donat timorem Dei. Sagitta candens incendit animam; vir autem operator boni exstinguit eam. Clamorem et blasphemiam aversatur scientia: sermones autem dolosos fugit sapientia. Suave est mel, et dulcis favus: scientia autem Dei dulcior ambobus. Audi, monache, sermones patris tui, et ne irritas facias eruditiones ejus. Cum miserit te, obaudi ei, et quantum ad mentem comitere cum eo: hoc enim modo effugies cogitationes malas, et maligni daemones non praevalebunt adversum te. Si crediderit tibi pecuniam, non dispergas illam: et si superoperatus fueris, non delineas apud te. Malus dispensator contribulabit animas fratrum; et memor malitiae non miserebitur eorum. Qui disperdit substantiam monasterii, fraudat Deum: et qui negligit eam, non erit impunitus. Iniquus dispensator, distribuit male; justus autem ut dignum est dispensabit. Qui male loquitur de fratre suo exterminabitur: negligens autem egentem non videbit lumen. Melior est saecularis in infirmitate serviens fratri, quam anachoretes qui non miseretur proximo suo. Insipiens monachus negligit instrumenta artis suae; sapiens autem curam habebit illorum. Ne dixeris, hodie maneo, et eras exibo: quia non in sapientia cogitasti de hoc ipso. Circuitor monachus meditabitur sermones falsos; proprium autem ludificabitur patrem. Qui exornat vestimenta sua, et implet ventrem suum, hic pascit cogitationes turpes, et cum sanctis concilium non habebit.","prev":{"citation":"Sententiae 1.52-77","label":"1.52 to 1.77","url":"https://interlinea.aeterna-institute.org/library/latin/evagrius-monachus/sententiae/1.52","api":"https://interlinea.aeterna-institute.org/api/v1/library/latin/evagrius-monachus/sententiae/1.52"},"next":{"citation":"Sententiae 1.107-135","label":"1.107 to 1.135","url":"https://interlinea.aeterna-institute.org/library/latin/evagrius-monachus/sententiae/1.107","api":"https://interlinea.aeterna-institute.org/api/v1/library/latin/evagrius-monachus/sententiae/1.107"},"credit":{"text":"Evagrius Monachus, Sententiae, ed. J.-P. Migne. Text: Open Greek and Latin, Patrologia Latina (University of Leipzig), CC BY-SA 4.0. Changes: notes, column numbers and editors' prefaces removed, line-end hyphens joined and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/OpenGreekAndLatin/patrologia_latina-dev/blob/8c651f859f821f0868755596f1a513946ca25350/data/tmp382/tmp382/tmp382.tmp382.opp-lat1.xml","quality":"ocr"}}