{"kind":"section","lang":"la","language":"Latin","title":"Arateorum fragmenta 2","citation":"Germanicus, Arateorum fragmenta 2","ref":"2","level":null,"urn":null,"url":"https://interlinea.aeterna-institute.org/library/latin/germanicus/arateorum-fragmenta/2","api":"https://interlinea.aeterna-institute.org/api/v1/library/latin/germanicus/arateorum-fragmenta/2","markdown":"https://interlinea.aeterna-institute.org/library/latin/germanicus/arateorum-fragmenta/2.md","author":{"name":"Germanicus","url":"https://interlinea.aeterna-institute.org/library/latin/germanicus"},"work":{"title":"Arateorum fragmenta","url":"https://interlinea.aeterna-institute.org/library/latin/germanicus/arateorum-fragmenta","urn":null},"verse":true,"words":369,"text":"Haec uia Solis erit bis senis lucida signis.\nNobilis hic aries aurato uellere, quondam\nQui tulit in Tauros Phrixum, qui prodidit Hellen,\nQuem propter fabricata ratis, quem perfida Colchis\nSopito uigile incesto donauit amori.\nCorniger hic taurus, cuius decepta figura\nEurope, thalamis et uirginitate relicta,\nPer freta sublimis tergo mendacia sensit\nLitora, Cretaeo partus enixa marito.\nSunt gemini, quos nulla dies sub Tartara misit;\nSed caelo semper, nautis laetissima signa,\nLedaeos statuit iuuenis pater ipse deorum.\nTe quoque, fecundam meteret cum comminus hydram\nAlcides, ausum morsu contingere *bello\nSidere donauit, cancer, Saturnia Iuno,\nNumquam oblita sui, numquam secura nouerca.\nHinc Nemeaeus erit iuxta leo; tunc pia uirgo;\nScorpios hinc duplo quam cetera possidet orbe\nSidera, per chelas geminato lumine fulgens,\nQuem mihi diua canet dicto prius Orione.\nInde sagittifero tentus curuabitur arcus,\nQui solitus Musas uenerari supplice plausu\nAcceptus caelo Phoebeis ardet in armis.\nCochlidis inuentor, cuius Titania flatu\nProelia commisit diuorum laetior aetas\nBellantem comitata Iouem, pietatis honorem,\nVt fuerat geminus forma, sic sidere, cepit.\nHic, Auguste, tuum genitali corpore numen\nAttonitas inter gentis patriamque pauentem\nIn caelum tulit et maternis reddidit astris.\nProximus infestas, olim quas fugerat, undas\nDeucalion paruam defundens indicat urnam.\nAnnua concludunt Syriae duo numina piscis\nTempora; tunc iterum praedictus nascitur ordo\nLanigeri et tauri, geminorum, postea cancri\nTunc leo, tunc uirgo, tunc scorpios, arcitenensque\nEt gelidus capricornus et imbrifer et duo pisces.\nHuius quantum altas demergitur orbis in undas\nOceani, tantum liquidum super aera lucet\nVna uia est solis bis senis lucida signis.\nHac rapitur Phoebe, per idem Cythereius ignis\nFertur iter, per idem cristatus uertice Mauors\nMercuriusque celer, regno caeloque uerendus\nIuppiter et tristi Saturnus lumine tardus.\nOmnibus his gemini motus, quorum alter ab ipsis\nNascitur et proprios ostendit sidere nisus-\nTunc mundum subeunt lento pede- concitus alter\nInuitos rapit et caeli circumrotat orbem.\nAnnua sol medius designat tempora, Phoebe\nMenstrua, namque anno solem remeare uidebis,\nMouerit unde suos currus per signa uolantis.\nHoc peragit spatium breuiore citatior orbe\nMensem expleturis Phoebe contenta diebus.\nAnnuus est Veneri cursus neque tardior illa\nMercurius, binos Gradiuus perficit orbis.\nPer duodena pater superum dum signa feretur\nBis senos Phoebus iam tunc compleuerit annos.\nCursus inaequalis cunctis: nunc igne citato\nFestinare putes, nunc pigro sidere somno.","prev":null,"next":{"citation":"Arateorum fragmenta 3","label":"3","url":"https://interlinea.aeterna-institute.org/library/latin/germanicus/arateorum-fragmenta/3","api":"https://interlinea.aeterna-institute.org/api/v1/library/latin/germanicus/arateorum-fragmenta/3"},"credit":{"text":"Germanicus, Arateorum fragmenta. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/GERM%7Cfrag%7C002","quality":"proofread"}}