{"kind":"section","lang":"la","language":"Latin","title":"Claudius Caesar Germanicus: Aratea 360-404","citation":"Germanicus, Claudius Caesar Germanicus: Aratea 360-404","ref":"360","level":null,"urn":null,"url":"https://interlinea.aeterna-institute.org/library/latin/germanicus/claudius-caesar-germanicus-aratea/360","api":"https://interlinea.aeterna-institute.org/api/v1/library/latin/germanicus/claudius-caesar-germanicus-aratea/360","markdown":"https://interlinea.aeterna-institute.org/library/latin/germanicus/claudius-caesar-germanicus-aratea/360.md","author":{"name":"Germanicus","url":"https://interlinea.aeterna-institute.org/library/latin/germanicus"},"work":{"title":"Claudius Caesar Germanicus: Aratea","url":"https://interlinea.aeterna-institute.org/library/latin/germanicus/claudius-caesar-germanicus-aratea","urn":null},"verse":true,"words":287,"text":"Auster pristin agit. duo sidera perlegit unum,\nNamque aries supra pristin piscesque feruntur.\nBelua sed ponti non multum praeterit amnem,\nAmnem, qui Phaethonta suas defleuit ad undas,\nPostquam patris equos non aequo pondere rexit,\nVulnere reddentem flammas Iouis; hunc, noua silua,\nPlanxere ignotis maestae Phaethontides ulnis.\nEridanus medius liquidis interiacet astris.\nHuius pars undae laeuum ferit Orionis\nLapsa pedem. procul ambobus qui piscibus unus\nVincula conectit, nodus cristam super ipsam\nAequoreae pristis radiat. sunt libera caelo\nSidera non ullam specie reddentia formam\nSub leporis latus auersam post denique puppim\nInter et Eridani flexus clauumque carinae.\nAtque haec ipsa notast nullam praebere figuram,\nSunt etenim toto sparsi sine nomine mundo\nInter signa ignes, quibus etsi propria desit\nForma, per appositi noscuntur lumina signi.\nEst etiam a geminis diuersus piscibus unus,\nQui borean fugitat, totus directus in austros,\nVentre sub aegoceri, pristin conuersus ad imam.\nInfimus hydrochoos sed qua uestigia figit,\nSunt aliae stellae; qua caudam belua flectit\nQuaque caput piscis, media regione locatae\nNullum nomen habent nec causast nominis ulla,\nSic tenuis cunctis iam paene euanuit ardor.\nNec procul hinc dextra defundit aquarius undas\nAtque imitata cadunt errantis signa liquoris.\nE quibus una magis sub cauda flamma relucet\nSquamigerae pristis, pedibus subit altera signi\nFundentis latices. est et sine honore corona\nAnte sagittiferi paullum pernicia crura.\nScorpios erecta torquet qua spicula cauda,\nTuribulum uicinum austris sacro igne uidebis\nArcturum contra; sed quanto tardius ille\nOceanum occasu tangit, tanto magis artae\nTuribuli metae. uix caelum suspicit et iam\nPraecipiti tractu uastis dimittitur undis.\nMulta dedit natura homini rata signa salutis\nVenturamque notis cladem depellere suasit.\nInter certa licet numeres sub nocte cauenda\nTuribulum, nam si sordebunt cetera caeli\nNubibus obductis, illo splendente, timeto,\nNe pacem pelagi soluat uiolentior auster.","prev":{"citation":"Claudius Caesar Germanicus: Aratea 315-359","label":"Lines 315-359","url":"https://interlinea.aeterna-institute.org/library/latin/germanicus/claudius-caesar-germanicus-aratea/315","api":"https://interlinea.aeterna-institute.org/api/v1/library/latin/germanicus/claudius-caesar-germanicus-aratea/315"},"next":{"citation":"Claudius Caesar Germanicus: Aratea 405-447","label":"Lines 405-447","url":"https://interlinea.aeterna-institute.org/library/latin/germanicus/claudius-caesar-germanicus-aratea/405","api":"https://interlinea.aeterna-institute.org/api/v1/library/latin/germanicus/claudius-caesar-germanicus-aratea/405"},"credit":{"text":"Germanicus, CLAUDIUS CAESAR GERMANICUS: ARATEA. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/GERM%7Carat%7C001","quality":"proofread"}}