{"kind":"section","lang":"la","language":"Latin","title":"Claudius Caesar Germanicus: Aratea 492-535","citation":"Germanicus, Claudius Caesar Germanicus: Aratea 492-535","ref":"492","level":null,"urn":null,"url":"https://interlinea.aeterna-institute.org/library/latin/germanicus/claudius-caesar-germanicus-aratea/492","api":"https://interlinea.aeterna-institute.org/api/v1/library/latin/germanicus/claudius-caesar-germanicus-aratea/492","markdown":"https://interlinea.aeterna-institute.org/library/latin/germanicus/claudius-caesar-germanicus-aratea/492.md","author":{"name":"Germanicus","url":"https://interlinea.aeterna-institute.org/library/latin/germanicus"},"work":{"title":"Claudius Caesar Germanicus: Aratea","url":"https://interlinea.aeterna-institute.org/library/latin/germanicus/claudius-caesar-germanicus-aratea","urn":null},"verse":true,"words":288,"text":"Inde austro propior sol est aquilone relicto\nEt gelidas hiemes hebetato lumine portat.\nHuius tres caelo partes adsurgere cernes,\nQuinque latent undis et longa nocte feruntur.\nHos inter medius nullo minor orbis agetur,\nIn quo cum Phoebus radiatos extulit ignes,\nDiuidit aequali spatio noctemque diemque.\nBis redit haec facies, librato sidere, mundo,\nCum uer fecundum surgit, cum deficit aestas.\nSigna aries taurusque aequo tanguntur ab orbe,\nSed princeps aries totus fulgebit in illo,\nTauri armum subit et flexi duo sidera cruris.\nAt medium Oriona secat spiramque priorem\nHydri et crateram leuem coruique forantis\nVltima, deficiunt nigra qua sidera cauda.\nIllic et chelas transuerso lumine quaeres\nEt celsi partem anguis et a medio ophiuchum\nNec procul inde aquilam, toto capite incubat ardens\nPegasus et longae spatio ceruicis inhaeret.\nHos orbis, quorum tractus et signa notamus,\nRectus per medios percurrens traicit axis.\nTres interuallis paribus sine fine rotantur\nNec mutare uias possunt nec iungere sulcos.\nQuartus in obliquum tris unus colligat orbis,\nPartibus extremis diuersos implicat; unum\nInter utrumque secat medium desectus ab illo.\nNon si Palladia doctus formaret ab arte,\nDistantis orbis melius religasset ab uno.\nSed tribus idem ortus omni nascuntur ab aeuo\nAtque eadem occasus remanent certissima signa.\nQuartus ab oceano tantum uestigia mutat,\nObliquo currens spatio, quantum capricornus\nAestifero distat cancro, quam latus ad auras\nAetherias surgit, tam sacris mergitur undis.\nIn sex signiferum si quis diuiserit orbem\nAequalis partes, succumbet regula binis\nInferior signis spatii tantumque tenebit\nVna, sui lateris quantum a tellure recedit;\nNec tamen humanos uisus fugit ultimus orbis.\nHaec uia solis erit bis senis lucida signis.\nNobilis hic aries aurato uellere, quondam\nQui tulit in Tauros Phrixum, qui prodidit Hellen,\nQuem propter fabricata ratis, quem perfida Colchis\nSopito uigile incesto donauit amori.","prev":{"citation":"Claudius Caesar Germanicus: Aratea 448-491","label":"Lines 448-491","url":"https://interlinea.aeterna-institute.org/library/latin/germanicus/claudius-caesar-germanicus-aratea/448","api":"https://interlinea.aeterna-institute.org/api/v1/library/latin/germanicus/claudius-caesar-germanicus-aratea/448"},"next":{"citation":"Claudius Caesar Germanicus: Aratea 536-579","label":"Lines 536-579","url":"https://interlinea.aeterna-institute.org/library/latin/germanicus/claudius-caesar-germanicus-aratea/536","api":"https://interlinea.aeterna-institute.org/api/v1/library/latin/germanicus/claudius-caesar-germanicus-aratea/536"},"credit":{"text":"Germanicus, CLAUDIUS CAESAR GERMANICUS: ARATEA. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/GERM%7Carat%7C001","quality":"proofread"}}