{"kind":"section","lang":"la","language":"Latin","title":"Claudius Caesar Germanicus: Aratea 623-666","citation":"Germanicus, Claudius Caesar Germanicus: Aratea 623-666","ref":"623","level":null,"urn":null,"url":"https://interlinea.aeterna-institute.org/library/latin/germanicus/claudius-caesar-germanicus-aratea/623","api":"https://interlinea.aeterna-institute.org/api/v1/library/latin/germanicus/claudius-caesar-germanicus-aratea/623","markdown":"https://interlinea.aeterna-institute.org/library/latin/germanicus/claudius-caesar-germanicus-aratea/623.md","author":{"name":"Germanicus","url":"https://interlinea.aeterna-institute.org/library/latin/germanicus"},"work":{"title":"Claudius Caesar Germanicus: Aratea","url":"https://interlinea.aeterna-institute.org/library/latin/germanicus/claudius-caesar-germanicus-aratea","urn":null},"verse":true,"words":276,"text":"Surgentis etiam chelas sua signa notabunt:\nExilit oceano nunc toto crine bootes,\nQuem claro ueniens arcturus nuntiat ore,\nCelsaque puppis habet, cauda minus attamen hydra,\nNixa genu species flexo redit ardua crure,\nPartibus haud aliis; nocte eluctata suprema\nBis solet illa una caelo se ostendere nocte,\nNam si Phoebeos currus, dum longa uenit nox,\nOccasu sequitur, rursus fugit oceanum ortu\nCrure simul chelis fulgens. cum scorpius exit,\nIam totis radiat membris miserabile sidus;\nAt cum tantum abiit, quantum lyra surgit ab undis,\nArcus ipsa suo caelo referetur imago.\nImperfecta redit caelo tum tota corona\nEt Chiron pius ad caudam cognoscitur imam.\nPegasus abscondit toto tunc pectore pennas\nNec lucet cauda praemersus pectore cygnus.\nAbdit et Andromede uultus et maxima pristis\nOccasu insequitur metuentis uirginis ora,\nCrista super caelo fulget. caput abditur ipse\nRegalis Cepheus alias intactus ab undis.\nScorpios exoriens, cum clarus fugerit amnis,\nScorpios Oriona fugat, pauet ille sequentem.\nSis uati placata, precor, Latonia uirgo;\nNon ego, non primus, ueteres cecinere poetae,\nVirginis intactas quondam contingere uestes\nAusum hominem diuae sacrum temerasse pudorem.\nDeuotus poenae tunc impius ille futurae\nNudabatque feris angusto stipite siluas\nPacatamque Chion dono dabat Oenopioni.\nHaud patiens sed enim Phoebi germana repente\nNuminis ultorem media tellure reuulsa\nScorpion ingenti maiorem contulit hostem.\nParcite, mortales, numquam leuis ira deorum.\nHorret uulnus adhuc et spicula tincta ueneno\nFlebilis Orion et quamquam parte relicta\nCaeli *paene fugit, tamen altis mergitur undis,\nScorpios ardenti cum pectore contigit ortus.\nNil super Andromedae, nil pristis luce fruetur.\nIn caput atque umeros rapit orbis Cassiepiam,\nDecliuemque trahunt aeterni pondera mundi\nCorruptaque cadit forma, certauerat olim\nQua senis aequorei natis, cum litore Cancri\nDoridos et Panopes spectasset stulta choreas.","prev":{"citation":"Claudius Caesar Germanicus: Aratea 580-622","label":"Lines 580-622","url":"https://interlinea.aeterna-institute.org/library/latin/germanicus/claudius-caesar-germanicus-aratea/580","api":"https://interlinea.aeterna-institute.org/api/v1/library/latin/germanicus/claudius-caesar-germanicus-aratea/580"},"next":{"citation":"Claudius Caesar Germanicus: Aratea 667-709","label":"Lines 667-709","url":"https://interlinea.aeterna-institute.org/library/latin/germanicus/claudius-caesar-germanicus-aratea/667","api":"https://interlinea.aeterna-institute.org/api/v1/library/latin/germanicus/claudius-caesar-germanicus-aratea/667"},"credit":{"text":"Germanicus, CLAUDIUS CAESAR GERMANICUS: ARATEA. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/GERM%7Carat%7C001","quality":"proofread"}}