{"kind":"section","lang":"la","language":"Latin","title":"Ars conectandi 175","citation":"Jakob Bernoulli, Ars conectandi 175","ref":"175","level":null,"urn":null,"url":"https://interlinea.aeterna-institute.org/library/latin/jakob-bernoulli/ars-conectandi/175","api":"https://interlinea.aeterna-institute.org/api/v1/library/latin/jakob-bernoulli/ars-conectandi/175","markdown":"https://interlinea.aeterna-institute.org/library/latin/jakob-bernoulli/ars-conectandi/175.md","author":{"name":"Jakob Bernoulli","url":"https://interlinea.aeterna-institute.org/library/latin/jakob-bernoulli"},"work":{"title":"Ars conectandi","url":"https://interlinea.aeterna-institute.org/library/latin/jakob-bernoulli/ars-conectandi","urn":null},"verse":false,"words":333,"text":"Quo facto singulis, qui ludum ingressi sunt, bina rursum folia exhibentur, sed omnium palàm oculis in mensâ exposita; sic ut cujusque collusoris ludus caeteris ex parte detectus, ex parte occultus sit: tum verò de novo pecuniâ certare incipiunt, aucto, ut antea, alternis deposito, provocatoque pluris semper licitandi potestate concessâ. Tandem aperit unusquisque ludum suum collusoribus, & qui caeteris potiorem habere deprehenditur, universo deposito potitur. Potior autem est Quadriga Fluvio, & Fluvius Triga, quibus omnibus praefertur Quadriga Novenariorum. In Trigis & Quadrigis caeteris dignitatis ordo, in Fluviis punctorum numerus attenditur; sic Triga vel Quadriga Monadum praevalet Trigae vel Quadrigae Regum, & Fluvius 43 punctorum alium 42 antecellit. Si nemo collusorum Triga, Quadriga Fluviove sit instructus, is qui plura ejusdem speciei puncta numerare potest, deposito potitur. In casu verò omnimodae paritatis ludorum, ut cum duo ejusdem dignitatis Trigam aut Quadrigam, vel totidem punctorum Fluvium numerant, is alteri victoriam praeripit, qui ordine prior est, seu qui primus chartas accepit. Quibus suppositis & intellectis poterit quilibet collusorum visis primis suis duobus foliis calculo subducere, quae sibi sit expectatio ad vincendum, indeque colligere, quis in certando modus sit tenendus: quanquam enim licitationem non semper qualitati ludi proportionare debeat, ne collusoribus ludum suum prodat (quandoquidem anima hujus ludi est simulatio, & hîc praecipuè in usum vertendum, quod Galli vocant, faire konne mine à mauvais jeu, ut alii, quibus melior fortasse ludus contigit, fictâ hujus confidentiâ decepti ab ultrà-certando absterreantur) negari tamen non potest, quin praevia expectationis cognitio ad ipsam hanc simulationem moderandam & gubernandam adjumentum haud leve conferre possit. Nos calculi specimen in unico tantùm exemplo exhibebimus; Quoniam observatum olim mihi multoties recordor, hunc cui ab initio duo Novenarii obtigerant, non obstante hâc ludi bonitate perdidisse, cupidus sum sciendi, quanto majorem talis vincendi quàm perdendi spem habeat. Atque ut quaestionem plene determinem, pono me ordine priorem esse collusore, mihi primis duabus chartis duos obtigisse Novenarios, alterique unum (sive quod hoc ex provocationis meae acceptatione praesumam, sive quod aliunde mihi constet) & quaerendam esse utriusque expectationem. Primò considero omnes possibiles status, in quos ludum prosequendo pervenire possum.","prev":{"citation":"Ars conectandi 174","label":"PROBLEMA XVIII","url":"https://interlinea.aeterna-institute.org/library/latin/jakob-bernoulli/ars-conectandi/174","api":"https://interlinea.aeterna-institute.org/api/v1/library/latin/jakob-bernoulli/ars-conectandi/174"},"next":{"citation":"Ars conectandi 176","label":"PROBLEMA XVIII","url":"https://interlinea.aeterna-institute.org/library/latin/jakob-bernoulli/ars-conectandi/176","api":"https://interlinea.aeterna-institute.org/api/v1/library/latin/jakob-bernoulli/ars-conectandi/176"},"credit":{"text":"Jakob Bernoulli, Ars conectandi. Text: NOSCEMUS Digital Sourcebook (Universität Innsbruck), CC BY 4.0. Changes: page furniture removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://wiki.uibk.ac.at/noscemus/Ars_coniectandi","quality":"ocr"}}