{"kind":"section","lang":"la","language":"Latin","title":"Prologi 1.29-35","citation":"Justin, Prologi 1.29-35","ref":"1.29","level":null,"urn":null,"url":"https://interlinea.aeterna-institute.org/library/latin/justin/prologi/1.29","api":"https://interlinea.aeterna-institute.org/api/v1/library/latin/justin/prologi/1.29","markdown":"https://interlinea.aeterna-institute.org/library/latin/justin/prologi/1.29.md","author":{"name":"Justin","url":"https://interlinea.aeterna-institute.org/library/latin/justin"},"work":{"title":"Prologi","url":"https://interlinea.aeterna-institute.org/library/latin/justin/prologi","urn":null},"verse":false,"words":276,"text":"PROLOGVS LIBRI XV. Quinto decimo uolumine continentur haec. Ut Demetrius Antigoni filius Gazae uictus est ab Ptolomaeo. Ut Cassander in Macedonia filium Alexandri regis interfecit, ac alterum Polyperchon. Ut Cypro Ptolomaeum uicit classe Demetrius idemque ab obsidione Rhodi summotus est. Repetita in excessu origo Rhodiorum. Unde digressus Demetrius liberauit a Cassandro Graeciam. Dein pater eius Antigonus bellum cum Lysimacho et Seleuco habuit, repetitaeque Seleuci res et regis Indiae Sandrocotti. Ut uictus bello Antigonus interiit reliquiaeque imperii sunt a filio collectae. Cleonymi deinde Spartani res gestae Corcyrae et Illyrico et in Italia, cui ablata Corcyra. Rex Cassander interiit. PROLOGVS LIBRI XVI. Sexto decimo uolumine continentur haec. Ut mortuo Cassandro ortisque inter filios eius certaminibus Demetrius adiutor alteri adhibitus occiso eo Macedoniae regnum tenuit: quo mox euictus a Pyrro Epiri rege, translatis in Asiam bellis captus a Seleuce decessit. Ut Ptolomaeus nuncupato successore filio Philadelpho decessit. Ut Lysimachus in Ponto captus ac missus a Dromichaete rursus in Asia ciuitates, quae sub Demetrio fuerant, et in Ponto Heracleam occuparit. Repetitae inde Bithyniae et Heracleoticae origines, tyrannique Heracleae Clearchus et Satyrus et Dionysius, quorum filiis interfectis Lysimachus occupauit urbem. PROLOGVS LIBRI XVII. Septimo decimo uolumine continentur haec. Ut Lysimachus occiso filio Agathocle per nouercam Arsinoen bellum cum rege Seleuco habuit, quo uictus interiit: ultimumque certamen conmilitonum Alexandri fuit. Ut Seleucus amissis in Cappadocia cum Diodoro copiis interfectus est ab Ptolomaeo fratre Arsinoes uxoris Lysimachi, in cuius uicem Ptolomaeus cognomine Ceraunus creatus ab exercitu rex Macedoniam occupauit; bella cum Antiocho et Pyrro conposuit, datis Pyrro auxiliis, quibus iret contra Romanos defensum Tarentum. Inde repetitae origines regum Epiroticorum usque ad Pyrrum, ipsiusque Pyrri res gestae priusquam in Italiam traiecit. PROLOGVS LIBRI XVIII.","prev":{"citation":"Prologi 1.20-28","label":"1.20 to 1.28","url":"https://interlinea.aeterna-institute.org/library/latin/justin/prologi/1.20","api":"https://interlinea.aeterna-institute.org/api/v1/library/latin/justin/prologi/1.20"},"next":{"citation":"Prologi 1.36-46","label":"1.36 to 1.46","url":"https://interlinea.aeterna-institute.org/library/latin/justin/prologi/1.36","api":"https://interlinea.aeterna-institute.org/api/v1/library/latin/justin/prologi/1.36"},"credit":{"text":"Justin, Prologi. Text: The Latin Library (thelatinlibrary.com), used with permission. Changes: HTML markup removed and the text divided into reading sections by Interlinea.","license":"Used with permission","licenseUrl":"https://www.thelatinlibrary.com/about.html","source":"https://www.thelatinlibrary.com/justin/prologi.html","quality":"proofread"}}