{"kind":"section","lang":"la","language":"Latin","title":"Cynegetica 138-184","citation":"Nemesianus, Cynegetica 138-184","ref":"138","level":null,"urn":null,"url":"https://interlinea.aeterna-institute.org/library/latin/nemesianus/cynegetica/138","api":"https://interlinea.aeterna-institute.org/api/v1/library/latin/nemesianus/cynegetica/138","markdown":"https://interlinea.aeterna-institute.org/library/latin/nemesianus/cynegetica/138.md","author":{"name":"Nemesianus","url":"https://interlinea.aeterna-institute.org/library/latin/nemesianus"},"work":{"title":"Cynegetica","url":"https://interlinea.aeterna-institute.org/library/latin/nemesianus/cynegetica","urn":null},"verse":true,"words":289,"text":"Pondere nam catuli poteris perpendere uires\nCorporibusque leues grauibus praenoscere cursu.\nQuin et flammato ducatur linea longe\nCircuitu signetque habilem uapor igneus orbem,\nInpune ut medio possis consistere circo:\nHuc omnes catuli, huc indiscreta feratur\nTurba: dabit mater partus examen, honestos\nIudicio natos seruans trepidoque periclo.\nNam postquam conclusa uidet sua germina flammis,\nContinuo saltu transcendens feruida zonae\nVincla, rapit rictu primum portatque cubili,\nMox alium, mox deinde alium. sic conscia mater\nSegregat egregiam subolem uirtutis amore.\nHos igitur genetrice simul iam uere sereno\nMolli pasce sero (passim nam lactis abundans\nTempus adest, albent plenis et ouilia mulctris),\nInterdumque cibo cererem cum lacte ministra,\nFortibus ut sucis teneras conplere medullas\nPossint et ualidas iam tunc promittere uires.\nSed postquam Phoebus candentem feruidus axem\nContigerit tardasque uias Cancrique morantis\nSidus init, tunc consuetam minuisse saginam\nProfuerit tenuesque magis retinere cibatus,\nNe grauis articulos deprauet pondere moles.\nNam tum membrorum nexus nodosque relaxant\nInfirmosque pedes et crura natantia ponunt,\nTunc etiam niueis armantur dentibus ora.\nSed neque conclusos teneas neque uincula collo\nInpatiens circumdederis noceasque futuris\nCursibus inprudens. catulis nam saepe remotis\nAut uexare trabes, laceras aut pandere ualuas\nMens erit, et teneros torquent conatibus artus\nObtunduntue nouos adroso robore dentes\nAut teneros duris inpingunt postibus ungues;\nMox cum iam ualidis insistere cruribus aetas\nPassa, quater binos uoluens ab origine menses,\nInlaesis catulos spectauerit undique membris,\nTunc rursus miscere sero Cerealia dona\nConueniet fortemque dari de frugibus escam.\nLibera tunc primum consuescant colla ligari\nConcordes et ferre gradus clausique teneri.\nIam cum bis denos Phoebe reparauerit ortus,\nIncipe non longo catulos producere cursu,\nSed paruae uallis spatio septoue nouali.\nHis leporem praemitte manu, non uiribus aequis\nNec cursus uirtute parem, sed tarda trahentem\nMembra, queant iam nunc faciles ut sumere praedas.","prev":{"citation":"Cynegetica 94-137","label":"Lines 94-137","url":"https://interlinea.aeterna-institute.org/library/latin/nemesianus/cynegetica/94","api":"https://interlinea.aeterna-institute.org/api/v1/library/latin/nemesianus/cynegetica/94"},"next":{"citation":"Cynegetica 185-230","label":"Lines 185-230","url":"https://interlinea.aeterna-institute.org/library/latin/nemesianus/cynegetica/185","api":"https://interlinea.aeterna-institute.org/api/v1/library/latin/nemesianus/cynegetica/185"},"credit":{"text":"Nemesianus, Cynegetica. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/NEMES%7Ccyne%7C001","quality":"proofread"}}