{"kind":"section","lang":"la","language":"Latin","title":"Cynegetica 48-93","citation":"Nemesianus, Cynegetica 48-93","ref":"48","level":null,"urn":null,"url":"https://interlinea.aeterna-institute.org/library/latin/nemesianus/cynegetica/48","api":"https://interlinea.aeterna-institute.org/api/v1/library/latin/nemesianus/cynegetica/48","markdown":"https://interlinea.aeterna-institute.org/library/latin/nemesianus/cynegetica/48.md","author":{"name":"Nemesianus","url":"https://interlinea.aeterna-institute.org/library/latin/nemesianus"},"work":{"title":"Cynegetica","url":"https://interlinea.aeterna-institute.org/library/latin/nemesianus/cynegetica","urn":null},"verse":true,"words":276,"text":"Nos saltus uiridesque plagas camposque patentes\nScrutamur totisque citi discurrimus aruis\nEt uarias cupimus facili cane sumere praedas;\nNos timidos lepores, inbelles figere dammas\nAudacesque lupos, uulpem captare dolosam\nGaudemus; nos flumineas errare per umbras\nMalumus et placidis ichneumona quaerere ripis\nInter harundineas segetes faelemque minacem\nArboris in trunco longis praefigere telis\nInplicitumque sinu spinosi corporis erem\nFerre domum; talique placet dare lintea curae,\nDum non magna ratis, uicinis sueta moueri\nLitoribus tutosque sinus percurrere remis.\nNunc primum dat uela notis portusque fideles\nLinquit et Adriacas audet temptare procellas.\nMox uestros meliore lyra memorare triumphos\nAccingar, diui fortissima pignora Cari,\nAtque canam nostrum geminis sub finibus orbis\nLitus et edomitas fraterno numine gentes,\nQuae Rhenum Tigrimque bibunt Ararisque remotum\nPrincipium Nilique +bibunt+ in origine fontem;\nNec taceam, primum quae nuper bella sub Arcto\nFelici, Carine, manu confeceris, ipso\nPaene prior genitore deo, utque intima frater\nPersidos et ueteres Babylonos ceperit arces,\nVltus Romulei uiolata cacumina regni;\nInbellemque fugam referam clausasque pharetras\nParthorum laxosque arcus et spicula nulla.\nHaec uobis nostrae libabunt carmina Musae,\nCum primum uultus sacros, bona numina terrae,\nContigerit uidisse mihi: iam gaudia uota\nTemporis inpatiens sensus spretorque morarum\nPraesumit uideorque mihi iam cernere fratrum\nAugustos habitus, Romam clarumque senatum\nEt fidos ad bella duces et milite multo\nAgmina, quis fortes animat deuotio mentes:\nAurea purpureo longe radiantia uelo\nSigna micant sinuatque truces leuis aura dracones.\nTu modo, quae saltus placidos siluasque pererras,\nLatonae, Phoebe, magnum decus, heia age suetos\nSume habitus arcumque manu pictamque pharetram\nSuspende ex umeris, sint aurea tela sagittae;\nCandida puniceis aptentur crura cothurnis;\nSit chlamys aurato multum subtegmine lusa\nConrugesque sinus gemmatis balteus artet\nNexibus; inplicitos cohibe diademate crines.","prev":{"citation":"Cynegetica 1-47","label":"Lines 1-47","url":"https://interlinea.aeterna-institute.org/library/latin/nemesianus/cynegetica/1","api":"https://interlinea.aeterna-institute.org/api/v1/library/latin/nemesianus/cynegetica/1"},"next":{"citation":"Cynegetica 94-137","label":"Lines 94-137","url":"https://interlinea.aeterna-institute.org/library/latin/nemesianus/cynegetica/94","api":"https://interlinea.aeterna-institute.org/api/v1/library/latin/nemesianus/cynegetica/94"},"credit":{"text":"Nemesianus, Cynegetica. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/NEMES%7Ccyne%7C001","quality":"proofread"}}