{"kind":"section","lang":"la","language":"Latin","title":"Cynegetica 94-137","citation":"Nemesianus, Cynegetica 94-137","ref":"94","level":null,"urn":null,"url":"https://interlinea.aeterna-institute.org/library/latin/nemesianus/cynegetica/94","api":"https://interlinea.aeterna-institute.org/api/v1/library/latin/nemesianus/cynegetica/94","markdown":"https://interlinea.aeterna-institute.org/library/latin/nemesianus/cynegetica/94.md","author":{"name":"Nemesianus","url":"https://interlinea.aeterna-institute.org/library/latin/nemesianus"},"work":{"title":"Cynegetica","url":"https://interlinea.aeterna-institute.org/library/latin/nemesianus/cynegetica","urn":null},"verse":true,"words":281,"text":"Tecum Naiades faciles uiridique iuuenta\nPubentes Dryades Nymphaeque, unde amnibus umor,\nAdsint, et docilis decantet Oreadas Echo.\nDuc age, diua, tuum frondosa per auia uatem:\nTe sequimur, tu pande domos et lustra ferarum.\nHuc igitur mecum, quisquis percussus amore\nVenandi damnas lites auidosque tumultus\nCiuilesque fugis strepitus bellique fragores\nNec praedas auido sectaris gurgite ponti.\nPrincipio tibi cura canum non segnis ab anno\nIncipiat primo, cum Ianus, temporis auctor,\nPandit inocciduum bis senis mensibus aeuum.\nElige tunc cursu facilem facilemque recursu,\nSeu Lacedaemonio natam seu rure Molosso,\nNon humili de gente canem. sit cruribus altis,\nSit rigidis, multamque trahat sub pectore lato\nCostarum sub fine decenter prona carinam,\nQuae sensim rursus sicca se colligat aluo,\nRenibus ampla satis ualidis diductaque coxas,\nCuique nimis molles fluitent in cursibus aures.\nHuic parilem submitte marem, sic omnia magnum,\nDum superant uires, dum laeto flore iuuentas\nCorporis et uenis primaeui sanguis abundat.\nNamque graues morbi subeunt segnisque senectus,\nInualidamque dabunt non firmo robore prolem.\nSed diuersa magis feturae conuenit aetas:\nTu bis uicenis plenum iam mensibus acrem\nIn uenerem permitte marem; sit femina, binos\nQuae tulerit soles. haec optima cura iugandis.\nMox cum se bina formarit lampade Phoebe\nEx quo passa marem genitalia uiscera turgent,\nFecundos aperit partus matura grauedo,\nContinuo largaque uides strepere omnia prole.\nSed, quamuis auidus, primos contemnere partus\nMalueris; mox non omnes nutrire minores.\nNam tibi si placitum populosos pascere fetus,\nIam macie tenues sucique uidebis inanes\nPugnantesque diu, quisnam prior ubera lambat,\nDistrahere inualidam lassato uiscere matrem.\nSin uero haec cura est, melior ne forte necetur\nAbdaturue domo, catulosque probare uoluntas,\nQuis nondum gressus stabiles neque lumina passa\nLuciferum uidere iubar, quae prodidit usus\nPercipe et intrepidus spectatis annue dictis.","prev":{"citation":"Cynegetica 48-93","label":"Lines 48-93","url":"https://interlinea.aeterna-institute.org/library/latin/nemesianus/cynegetica/48","api":"https://interlinea.aeterna-institute.org/api/v1/library/latin/nemesianus/cynegetica/48"},"next":{"citation":"Cynegetica 138-184","label":"Lines 138-184","url":"https://interlinea.aeterna-institute.org/library/latin/nemesianus/cynegetica/138","api":"https://interlinea.aeterna-institute.org/api/v1/library/latin/nemesianus/cynegetica/138"},"credit":{"text":"Nemesianus, Cynegetica. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/NEMES%7Ccyne%7C001","quality":"proofread"}}