{"kind":"section","lang":"la","language":"Latin","title":"De aucupio 1","citation":"Nemesianus, De aucupio 1","ref":"1","level":null,"urn":null,"url":"https://interlinea.aeterna-institute.org/library/latin/nemesianus/de-aucupio/1","api":"https://interlinea.aeterna-institute.org/api/v1/library/latin/nemesianus/de-aucupio/1","markdown":"https://interlinea.aeterna-institute.org/library/latin/nemesianus/de-aucupio/1.md","author":{"name":"Nemesianus","url":"https://interlinea.aeterna-institute.org/library/latin/nemesianus"},"work":{"title":"De aucupio","url":"https://interlinea.aeterna-institute.org/library/latin/nemesianus/de-aucupio","urn":null},"verse":true,"words":114,"text":"Et tetracem, Romae quem nunc uocitare taracem\nCoeperunt. auium est multo stultissima: namque\nCum pedicas necti sibi contemplauerit astans,\nImmemor ipse sui, tamen in dispendia currit.\nTu uero, adductos laquei cum senseris orbes,\nAppropera et praedam pennis crepitantibus aufer:\nNam celer oppressi fallacia uincula colli\nExcutit, et rauca subsannat uoce magistri\nConsilium, et laeta fruitur iam pace solutus.\nHic prope Pontinum ad radices Appennini\nNidificat, patulis qua se sol obicit agris.\nPersimilis cineri deorsum, maculosaque terga\nInficiunt pullae cacabantis imagine notae.\nTarpeiae est custos arcis non corpore maior\nNec qui te uolucres docuit, Palamede, figuras.\nSaepe ego nutantem sub iniquo pondere uidi\nMazonomi puerum, portat cum prandia Circo\nQuae consul praetorue nouus construxit ouanti.","prev":null,"next":{"citation":"De aucupio 2","label":"Poem 2","url":"https://interlinea.aeterna-institute.org/library/latin/nemesianus/de-aucupio/2","api":"https://interlinea.aeterna-institute.org/api/v1/library/latin/nemesianus/de-aucupio/2"},"credit":{"text":"Nemesianus, De aucupio. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/NEMES%7Caucu%7C001","quality":"proofread"}}