{"kind":"section","lang":"la","language":"Latin","title":"Optice 202","citation":"Newton, Optice 202","ref":"202","level":null,"urn":null,"url":"https://interlinea.aeterna-institute.org/library/latin/newton/optice/202","api":"https://interlinea.aeterna-institute.org/api/v1/library/latin/newton/optice/202","markdown":"https://interlinea.aeterna-institute.org/library/latin/newton/optice/202.md","author":{"name":"Newton","url":"https://interlinea.aeterna-institute.org/library/latin/newton"},"work":{"title":"Optice","url":"https://interlinea.aeterna-institute.org/library/latin/newton/optice","urn":null},"verse":false,"words":290,"text":"Verum ex altera parte, ad a 6, a b, vel αβ, Colores isti multo etiam magis Confusi, quam antea, apparere debent; dilatati nimirum atque diffusi usque adeo, ut coloribus aliorum Ordinum intermisceantur. Similisque porro Confusio erit Colorum ad T ξ, inter e & f; si forte Refractio sit valde magna, vel Prisma a Vitris Objectivis valde remotum: Quo quidem in Casu nulla pars Annulorum sub aspectum veniet, praeter duos exiguos Arcus ad e & f; qui porro eo majori intervallo inter se distabunt, quo Prisina a Vitris Objectivis adhuc longius removeatur. Hique exigui Arcus distinctiores & albiores esse debent a media sui parte; ab extremitatibus autem, ubi confusi esse incipiunt, insimul colorati esse debent: Item Colores in una extremitate cujusque Arcus ordine contrario dispositi esse debent, atque in altera; propterea quod in Albitudine intermedia decussantur: Nempe extremitates Arcuum eae, quae spectant ad Tξ, erunt rubeae ac flavae illa sui parte, quae sit propior a Centro; ex altera autem parte, caeruleae ac violaceae; Extremitates autem eae, quae in contrarium spectant, erunt e contrario caeruleae ac violaceae illa sui parte, quae sit propior a Centro; ex altera autem parte, rubeae ac flavae. Jam sicut Omnia quae hactenus dicta sunt, ex Luminis Proprietatibus Mathematica Deductione consequuntur; ita Veritas ipsorum, Experimentis insuper manifesta fieri potest. Etenim si in Cubiculo tenebricoso inspiciantur per Prisma Annuli jam dicti, tum quum Reflexione diversorum Colorum Prismaticorum in Vitra Objectiva singulatim projectorum exhibeantur; quos nimirum Colores Prismaticos Adsistens Aliquis transferat huc illuc super Parietem vel Chartam e qua ad Vitra reflectantur, interea dum & Oculus Spectatoris & Prisma Oculo applicatum & Vitra ipsa Objectiva (sicuti in 13ra Observatione) Immota maneant; utique Circuli, quos diversi illi Colores singulatim exhibebunt, tali inter se Positu reperientur collocati comparate, qualem in Schematibus a bxv, vel abxv, vel αβξT, descripsi.","prev":{"citation":"Optice 201","label":"OPTICES","url":"https://interlinea.aeterna-institute.org/library/latin/newton/optice/201","api":"https://interlinea.aeterna-institute.org/api/v1/library/latin/newton/optice/201"},"next":{"citation":"Optice 203","label":"OPTICES","url":"https://interlinea.aeterna-institute.org/library/latin/newton/optice/203","api":"https://interlinea.aeterna-institute.org/api/v1/library/latin/newton/optice/203"},"credit":{"text":"Newton (with Samuel Clarke), Optice. Text: NOSCEMUS Digital Sourcebook (Universität Innsbruck), CC BY 4.0. Changes: page furniture removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://zenodo.org/records/15040256","quality":"ocr"}}