{"kind":"section","lang":"la","language":"Latin","title":"Optice 21","citation":"Newton, Optice 21","ref":"21","level":null,"urn":null,"url":"https://interlinea.aeterna-institute.org/library/latin/newton/optice/21","api":"https://interlinea.aeterna-institute.org/api/v1/library/latin/newton/optice/21","markdown":"https://interlinea.aeterna-institute.org/library/latin/newton/optice/21.md","author":{"name":"Newton","url":"https://interlinea.aeterna-institute.org/library/latin/newton"},"work":{"title":"Optice","url":"https://interlinea.aeterna-institute.org/library/latin/newton/optice","urn":null},"verse":false,"words":227,"text":"Etenim in ea Prismatis positione, Luminis Refractiones quae fierent in duobus Anguli refringentis lateribus, hoc est, ad ingressum & egressum Luminis, aequales erant inter se. Similiter, in aliis Experimentis, quotiescunque id agerem, ut Refractiones in utraque Prismatis facie inter se essent aequales; notavi Locum ubi Solis image Lumine refracto depicta, inter duos contrarios motus suos, in communi progressus & regressus sui confinio, consistere atque morari videretur: Et cum in istum locum incideret Imago, Prisma cohibui fixumque retinui. Atque in hac quidem positione, quippe omnium convenientissima, intelligendum est Prismata omnia in sequentibus experimentis esse collocata; nisi ubi alia aliqua positio nominatim describetur. Prismate igitur hâc in positione collocato; Lumen refractum chartae albae plagula, ad perpendiculum radiis objecta, in opposito Cubiculi pariete excepi: Solarisque Imaginis in Chartam eo Lumine depictae Figura atque Mensurae, quae essent, adnotavi. Imago oblonga erat; non tamen Ovalis; sed duabus rectis interque se parallelis lineis a Lateribus, & duobus semicirculis ab extremitatibus, terminata. A lateribus definiebatur terminis satis quidem distinctis: Ab extremitatibus autem, finibus valde confusis & minime distinctis; Lumine istis in locis deficiente paulatim, & evanescente. Latitudo Imaginis ea erat, quae Solis diametro responderet; utpote Uncias 28 complectens, inclusa penumbra. Quippe Imago, intervallo octodecim pedum cum dimidio, a Prismate distabat: Quo quidem intervallo interjecto, praedicta Imaginis latitudo, (subducta foraminis in operculo fenestrae diametro hoc est, 2 Unciae,) subtendebat Angulum ad Prisma circiter dimidii Gradus, qui est Solis apparens diameter.","prev":{"citation":"Optice 20-2","label":"PROP. II. THEOR. II","url":"https://interlinea.aeterna-institute.org/library/latin/newton/optice/20-2","api":"https://interlinea.aeterna-institute.org/api/v1/library/latin/newton/optice/20-2"},"next":{"citation":"Optice 22","label":"PROP. II. THEOR. II","url":"https://interlinea.aeterna-institute.org/library/latin/newton/optice/22","api":"https://interlinea.aeterna-institute.org/api/v1/library/latin/newton/optice/22"},"credit":{"text":"Newton (with Samuel Clarke), Optice. Text: NOSCEMUS Digital Sourcebook (Universität Innsbruck), CC BY 4.0. Changes: page furniture removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://zenodo.org/records/15040256","quality":"ocr"}}