{"kind":"section","lang":"la","language":"Latin","title":"Optice 233","citation":"Newton, Optice 233","ref":"233","level":null,"urn":null,"url":"https://interlinea.aeterna-institute.org/library/latin/newton/optice/233","api":"https://interlinea.aeterna-institute.org/api/v1/library/latin/newton/optice/233","markdown":"https://interlinea.aeterna-institute.org/library/latin/newton/optice/233.md","author":{"name":"Newton","url":"https://interlinea.aeterna-institute.org/library/latin/newton"},"work":{"title":"Optice","url":"https://interlinea.aeterna-institute.org/library/latin/newton/optice","urn":null},"verse":false,"words":258,"text":"Hocque perinde verum erit; etiamsi corporum refringentium numerus adaugeatur infinite, eorumque distantiae inter se tantundem minuantur, adeo ut Lumen jam refringi fingatur in singulis Trajectus sui punctis, continuisque illis Refractionibus in lineam plane curvam inflectatur. Quamobrem tota Refractio Luminis inter transeundum per Atmosphaeram ab altissima & rarissima ejus parte ad usque infimam & densissimam, aequalis esse debet Refractioni ei, quae esset futura Luminis simili Obliquitate transeuntis immediate ex Inani in Aerem qui sit pari Densitate ac infima pars Atmosphaerae. Jam quidem ex hac Tabula; si Refractiones PseudoTopazii, Selenitis, Crystalli de rupe, Crystalli Istandicae, Vitri communis, (hoc est, Arenae colliquefactae,) & Vitri Antimonii, (quae sunt Concreta terrestria, lapidea, Alcalizata;) atque Aeris, (qui, ut probabile est, generatur Fermentatione ex istiusmodi Corporibus;) comparentur inter se: apparebit corpora ista, quamvis Densitate valde inter se differentia, tamen Vires habere Refractivas eadem fere proportione inter se, ac ipsas Densitates suas; (excepto quod Refractio mirae illius Substantiae, Crystalli Istandicae, paulo major sit quam reliquorum:) Et nominatim Aerem, qui est 3400 partibus rarior quam Pseudo-Topazius, & 4200 partibus rarior quam Vitrum Antimonii; non obstante tanta illa Raritate, Vim tamen Refractivam, pro ratione quidem Densitatis suae, eandem plane habere, ac habent sibi duae illae valde Densae Substantiae; excepto quatenus eae quidem duae, differant inter seRursum, si Refractiones Camphorae, Olivi, Olei ex Lini semine, Spiritus resinae terebinthinae, & Electri, (quae sunt Corpora pinguia, sulphurea, unctuosa;) atque Adamantis, (qui, ut probabile est, substantia est unctuosa coagulata) comparentur itidem inter se: apparebit similiter haec quoque corpora Vires habere Refractivas eadem fere proportione inter se, ac ipsas Densitates suas; sine ulla quidem variatione notatu digna.","prev":{"citation":"Optice 231","label":"231","url":"https://interlinea.aeterna-institute.org/library/latin/newton/optice/231","api":"https://interlinea.aeterna-institute.org/api/v1/library/latin/newton/optice/231"},"next":{"citation":"Optice 234","label":"234","url":"https://interlinea.aeterna-institute.org/library/latin/newton/optice/234","api":"https://interlinea.aeterna-institute.org/api/v1/library/latin/newton/optice/234"},"credit":{"text":"Newton (with Samuel Clarke), Optice. Text: NOSCEMUS Digital Sourcebook (Universität Innsbruck), CC BY 4.0. Changes: page furniture removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://zenodo.org/records/15040256","quality":"ocr"}}