{"kind":"section","lang":"la","language":"Latin","title":"Optice 264","citation":"Newton, Optice 264","ref":"264","level":null,"urn":null,"url":"https://interlinea.aeterna-institute.org/library/latin/newton/optice/264","api":"https://interlinea.aeterna-institute.org/api/v1/library/latin/newton/optice/264","markdown":"https://interlinea.aeterna-institute.org/library/latin/newton/optice/264.md","author":{"name":"Newton","url":"https://interlinea.aeterna-institute.org/library/latin/newton"},"work":{"title":"Optice","url":"https://interlinea.aeterna-institute.org/library/latin/newton/optice","urn":null},"verse":false,"words":217,"text":"Pro eo autem, ut Radius Luminis Reflexi, Inclinando videlicet Speculum, recedebat magis magisque a Radio Luminis Incidentis, & a communi Centro Annulorum coloratorum inter duos istos Radios interjacente; ita Annuli isti in Amplitudinem perpetuo excrescebant, itemque Macula illa alba rotunda: & novi Annuli colorati emergebant Ordine e Centro ipsorum communi; & Macula illa Alba facta est Albus Annulus novis illis Annulis circunjectus; & Radii luminis Incidens ac Reflexus, semper incidebant in partes Annuli istius Albi sibi invicem e diametro oppositas, ibique in ejus circuitu Speciem duorum Parheliorum, qualia in Corona Solem ambien tenonnunquam videntur, Lumine suo exhibebant. Itaque Diameter istius Annuli, pertingens videlicet a medio Luminis ejus ex una parte ad medium Luminis ejus ex altera parte, semper aequalis erat Intervallo ei, quod inter mediam partem Radii Incidentis & mediam partem Radii Reflexi interjaceret, dimenso nimirum super Charta in qua Annuli videbantur. Porro, Radii qui Annulum istum formabant, Reflectebantur a Speculo in Angulis qui essent aequales Angulis suis Incidentiae, & consequenter Angulis suis Refractionis, qua ingrediebantur in Vitrum: Attamen Anguli sui Reflexionis, non erant in eodem Plano cum Angulis suis Incidentiae. OBS. XI. Colores novorum Annulorum contrario erant Ordine dispositi, ac priorum; Oriebantur autem hoc modo. Macula luminis alba rotunda in medio Annulorum, permansit Alba ad usque Centrum; usquedum Intervallum id, quo Radii Incidens & Reflexus distabant inter se super Charta, factum esset circiter?","prev":{"citation":"Optice 263","label":"OPTICES","url":"https://interlinea.aeterna-institute.org/library/latin/newton/optice/263","api":"https://interlinea.aeterna-institute.org/api/v1/library/latin/newton/optice/263"},"next":{"citation":"Optice 265","label":"OPTICES","url":"https://interlinea.aeterna-institute.org/library/latin/newton/optice/265","api":"https://interlinea.aeterna-institute.org/api/v1/library/latin/newton/optice/265"},"credit":{"text":"Newton (with Samuel Clarke), Optice. Text: NOSCEMUS Digital Sourcebook (Universität Innsbruck), CC BY 4.0. Changes: page furniture removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://zenodo.org/records/15040256","quality":"ocr"}}