{"kind":"section","lang":"la","language":"Latin","title":"Optice 307","citation":"Newton, Optice 307","ref":"307","level":null,"urn":null,"url":"https://interlinea.aeterna-institute.org/library/latin/newton/optice/307","api":"https://interlinea.aeterna-institute.org/api/v1/library/latin/newton/optice/307","markdown":"https://interlinea.aeterna-institute.org/library/latin/newton/optice/307.md","author":{"name":"Newton","url":"https://interlinea.aeterna-institute.org/library/latin/newton"},"work":{"title":"Optice","url":"https://interlinea.aeterna-institute.org/library/latin/newton/optice","urn":null},"verse":false,"words":270,"text":"Nam in his omnibus Hypothesibus phaenomena Luminis usque adhuc ita explicarunt Philosophi, ut ea ex novis quibusdam radiorum modificationibus oriri posuerint. Quae est Opinio errans. Si Lumen consisteret in Pressu solummodo, propagato sine Motu actuali; utique non posset id agitare & calefacere corpora, quae id refringunt & reflectunt. Si Lumen consisteret in Motu, propagato ad omnia intervalla in puncto temporis; utique ad Motum istum generandum opus esset Vi infinita, singulis momentis, in particulis singulis lucentibus. Et, si Lumen consisteret vel in Pressu vel in Motu, propagato per Medium fluidum; sive in momento id fieret, sive in spatio temporis; utique futurum esset, ut id in Umbram sese inflecteret. Etenim Pressus vel Motus in Medio fluido, ultra quod vis obstaculum, quod partem aliquam Motus impediat, propagari non potest in lineis rectis; sed omnino sese inflectet & diffundet quaquaversus, in Medium quiescens quod ultra id obstaculum jaceat. Vis Gravitans, deorsum tendit: Attamen Aquae Pressus, qui ex Vi Gravitatis oritur, tendit quaquaversus vi aequabili; & pari facilitate, paribusque etiam viribus, propagatur per curvas vias, ac per rectas. Undae in superficie aquae, dum oras lati cujusvis obstaculi praeterlabuntur, inflectunt sese & dilatant diffunduntque gradatim, in Aquam ultra id obstaculum quiescentem. Undae, pulsus, seu vibrationes Aeris, in quibus Soni consistunt, inflectunt se manifesto, licet non tantum quantum undae Aquae. Nam Sonus Campanae vel Tormenti bellici audiri potest trans Montem, cujus interpositu corpus id quod Sonum emittit, ne possit oculis cerni, intercluditur; & Soni propagantur pari facilitate per tubas incurvas, ac per rectas. At Lumen nunquam compertum est vias incurvas ingredi, nec sese in Umbram inflectere. Nam Stellae fixae, Planetarum cujusvis interpositu, continuo evanescunt; itemque Solis partes aliquae, interpositu Lunae, Mercurii, aut Veneris.","prev":{"citation":"Optice 306","label":"306","url":"https://interlinea.aeterna-institute.org/library/latin/newton/optice/306","api":"https://interlinea.aeterna-institute.org/api/v1/library/latin/newton/optice/306"},"next":{"citation":"Optice 308","label":"308","url":"https://interlinea.aeterna-institute.org/library/latin/newton/optice/308","api":"https://interlinea.aeterna-institute.org/api/v1/library/latin/newton/optice/308"},"credit":{"text":"Newton (with Samuel Clarke), Optice. Text: NOSCEMUS Digital Sourcebook (Universität Innsbruck), CC BY 4.0. Changes: page furniture removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://zenodo.org/records/15040256","quality":"ocr"}}