{"kind":"section","lang":"la","language":"Latin","title":"Optice 313","citation":"Newton, Optice 313","ref":"313","level":null,"urn":null,"url":"https://interlinea.aeterna-institute.org/library/latin/newton/optice/313","api":"https://interlinea.aeterna-institute.org/api/v1/library/latin/newton/optice/313","markdown":"https://interlinea.aeterna-institute.org/library/latin/newton/optice/313.md","author":{"name":"Newton","url":"https://interlinea.aeterna-institute.org/library/latin/newton"},"work":{"title":"Optice","url":"https://interlinea.aeterna-institute.org/library/latin/newton/optice","urn":null},"verse":false,"words":259,"text":"Et consequenter, si Spatia caelestia aeque densa essent, ac Aqua; haberent utique Vim resistendi non multo minorem, quam Aqua. Si aeque densa essent, ac Argentum vivum; vim resistendi haberent non multo minorem, quam Argentum vivum: Si perfecte planeque densa essent, sive Materiae plena, sine ullo omnino spatio vacuo: quantumvis licet fluida & subtilis esset ea materia; vim resistendi tamen haberent majorem, quam Argentum vivum. Globus plane solidus, in istiusmodi Medio, amitteret amplius dimidiam Motus sui partem, interea dum spatium ternas sui diametros longum percurreret. Et globus non plane solidus, (qualia sunt Planetarum corpora,) citius sisteretur. Quo itaque locus sit diuturnis & regularibus Planetarum Cometarumque Motibus, omnino necesse est ut spatia caelestia omni materia sint vacua; nisi forte excipiendi erunt tenuissimi aliqui vapores, exhalationes, vel effluvia, quae oriantur ex Atmosphaeris Terrae, Planetarum & Cometarum. Materia illa ficta & commentitia, qua caeli sint repleti, nullo modo utilis est ad explicanda phaenomena Naturae; quando Planetarum quidem & Cometarum Motus, ope Gravitatis, melius explicantur sine illa; gravitasque per illam nondum fuit explicata. Nihil aliud facere posset istiusmodi materia, nisi ut magnorum illorum corporum Motus interturbaret & retardaret, efficeretque ut Naturae Ordo languesceret; Et, in occultis corporum meatibus, nihil aliud quam sisteret partium suarum Motus vibrantes, in quibus calor ipsorum & vis omnis actuosa consistit. Porro, ut ad nullam rem utilis est istiusmodi materia; e contrario autem impediret operationes Naturae, languidioresque eas redderet; ita nulla firma ratio est, quae nos adducat ut esse omnino aliquam credamus; Ideoque penitus rejicienda est. Quod si illa rejecta erit; rejicientur simul Hypotheses eae, quibus Lumen in Pressu vel Motu per istiusmodi Medium propagato consistere fingitur.","prev":{"citation":"Optice 312","label":"312","url":"https://interlinea.aeterna-institute.org/library/latin/newton/optice/312","api":"https://interlinea.aeterna-institute.org/api/v1/library/latin/newton/optice/312"},"next":{"citation":"Optice 314","label":"314","url":"https://interlinea.aeterna-institute.org/library/latin/newton/optice/314","api":"https://interlinea.aeterna-institute.org/api/v1/library/latin/newton/optice/314"},"credit":{"text":"Newton (with Samuel Clarke), Optice. Text: NOSCEMUS Digital Sourcebook (Universität Innsbruck), CC BY 4.0. Changes: page furniture removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://zenodo.org/records/15040256","quality":"ocr"}}