{"kind":"section","lang":"la","language":"Latin","title":"Optice 331","citation":"Newton, Optice 331","ref":"331","level":null,"urn":null,"url":"https://interlinea.aeterna-institute.org/library/latin/newton/optice/331","api":"https://interlinea.aeterna-institute.org/api/v1/library/latin/newton/optice/331","markdown":"https://interlinea.aeterna-institute.org/library/latin/newton/optice/331.md","author":{"name":"Newton","url":"https://interlinea.aeterna-institute.org/library/latin/newton"},"work":{"title":"Optice","url":"https://interlinea.aeterna-institute.org/library/latin/newton/optice","urn":null},"verse":false,"words":227,"text":"Sal ille acidus, in Aqua dissolutus, idem est ac Oleum Sulphuris per Campanam,; permultusque cum sit in Visceribus Terrae, maximeque in Marchasitis, coalescit inde cum caeteris corporibus ex quibus constant Marchasitae; cum Bitumine scilicet, Ferro, Cupro & Terra; cumque illis conflat Alumen, Vitriolum & Sulpbur. Cum Terra sola nimirum, Alumen; cum Metallo solo, vel Metallo & Terra, Vitriolum; & cum Bitumine & Terra, Sulphur. Ex quo fit, ut Marchasitae tribus illis mineralibus abundent. Et annon mutuae attractioni attribuendum est, quod Materiae diversae, ex quibus haec constant mineralia, coeant & cohaereant ad ea conflanda? & quod Bitumen subvehat secum reliquam Sulphuris materiam, quae sine illo sublimari non posset? Idemque de omnibus, vel fere omnibus, quotquot usquam sunt corpora crassa, quaeri potest. Nam & Animalium & Plantarum partes omnes compositae sunt ex materiis volatilibus & fixis, fluidis & solidis; uti ex eorum Analysi quidem apparet: Itemque Sales & Mineralia; quantum Chymici quidem compositionem eorum usque adhuc pervestigare potuerint. Quum Mercurius sublimatus sublimatur denuo cum Argento vivo, fitque Mercurius dulcis; qui est Terra alba, saporis expers, & in Aqua haud dissolubilis: Cumque Mercurius dulcis, sublimatus iterum cum Spiritu Salis, revertitur in Mercurium sublimatum: Et quum Metalla paululo Acidi corrosa, convertuntur in rubiginem; quae est Terra saporis expers, & in Aqua non dissolubilis; Terraque ista plusculo Acidi macerata, fit Sal metallicus: Cumque Lapides quidam, ut Fluor Plumbi, idoneo Menstruo dissoluti, Sales fiunt: Annon haec omnia ostendunt, Sales constare ex Terra sicca & Acido aquoso attractione conjunctis?","prev":{"citation":"Optice 330","label":"330","url":"https://interlinea.aeterna-institute.org/library/latin/newton/optice/330","api":"https://interlinea.aeterna-institute.org/api/v1/library/latin/newton/optice/330"},"next":{"citation":"Optice 332","label":"332","url":"https://interlinea.aeterna-institute.org/library/latin/newton/optice/332","api":"https://interlinea.aeterna-institute.org/api/v1/library/latin/newton/optice/332"},"credit":{"text":"Newton (with Samuel Clarke), Optice. Text: NOSCEMUS Digital Sourcebook (Universität Innsbruck), CC BY 4.0. Changes: page furniture removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://zenodo.org/records/15040256","quality":"ocr"}}